Hamabi egun baino ez dira falta Bilboko Aste Nagusia hasteko, eta Bilboko Konpartsek aurkeztu dute beren programazioa. Haurrek, gazteek, helduek eta adinekoek jai giroaz gozatzeko aukera ematea izan dute helburu, eta sarean jarria dute egitarau osoa.
Seiehun jarduera baino gehiago izango dira. Kirolak eta gastronomiak ez ezik, musikak ere izango du parte garrantzitsua. Talde nabarmenen artean, Kaskagorri konpartsak Naxker eta Sukena aurkeztuko ditu; Euskalgunek, Eire eta Skabidean; Kulturgunek, Chuleria Joder eta Kaparrak; Algarak, Xiberoots, Bad Sound, Kiliki eta Mirua; eta Aixeberrik, Bengo. Baina horiek ez dira izango konpartsa bakoitzaren emanaldi bakarrak. Konpartsa guztiek beste talde, DJ eta disko jartze ugari ere antolatuko dituzte, estilo eta giro askotariko programazio batean, txosna guztietan musika eta festa giroa bermaturik.
Haurrentzat ere ia egunero prestatu dituzte jarduerak: arte eta sukaldaritza tailerrak, puzgarriak, txotxongiloak eta pailazoak, besteak beste. Gazteentzat, berriz, bueltan dira azken urteetan arrakastatsuak izan diren bi tailer: skate tailerra eta rap tailer emanaldia; azken horretan rap kantariak eta bertsolariak izango dira.
Kirola eta jana
Kirolak ere leku nabarmena izango du. Xake lehiaketa antolatu dute, eta piragua lasterketak ere izango dira. Ur jolasak, waterpolo partidak eta Rubik lehiaketa ere biltzen ditu programak. Hiri krosa ostiralean egingo dute, abuztuaren 22an, 17:00etan, eta saskibaloi lehiaketa Arriaga plazan izango da aurten.
Gastronomiazaleentzat, urtero bezala, Areatzan egingo dira lehiaketak. Abuztuaren 17an, esaterako, arroza izango du protagonista munduko plateraren lehiaketak. Eta 24an, buztan gisatu lehiaketa bueltan izango da Areatzan.
Ekintza guztiak kontsulta daitezke eskuorri ofizialean eta iaz martxan jarritako web aplikazioan. Aplikazioan, besteak beste, programazioa jasoa dago egunez egun, txosnen mapa, AstenagusiPedia eta erasoen aurkako protokoloak.
