Herriko lau plaza, sei ikuskizunetarako: jaialdi ibiltaria da Kilometro Lezo. 2020an abiatu zuten proiektu hori, Lezon (Gipuzkoa), «kultura sustatu nahian, geldirik baitzegoen» garai hartan. Ainhoa Salaberria Lezoko Udaleko kultura teknikariak gogoz hartzen ditu Kilometro Lezoko egunak, teknikari moduan ez ezik, baita lezoar moduan ere. Aurten, seigarren aldiz egiten ari dira jaialdia. Aurreko ostiralean hasi zen, eta irailaren 21ean izango dute azken emanaldia.
Kultura herriari hurbiltzea du helburu egitasmoak. «Gurean izan eta izango ditugun ikuskizun gehienak hemengoak dira, Euskal Herrikoak. Kultura maila altua dugu hemen, eta hori erakutsi beharreko zerbait da», azaldu du Salaberriak. Ikuskizunak lau plazatan izango dira: Gurutze Santuaren plazan, Lezo Herri Eskolako patioan, Lopene plazan eta Goiko plazan. «Dena doan da, eta, gainera, kalean izanda, jendea gehiago biltzen da. Batzuetan badirudi aretoetara sartzeko beldurra dugula, baina gurean halakorik ez gertatzea lortu dugu». Teknikariaren ustez, kale ikuskizunen hurbiltasuna eragiten dute ikusleengan, eta hori ezinbestekoa da.
Abuztuaren 22an, Markeliñe konpainiak Artilusio antzezlana jokatu zuen, Gurutze Santuaren plazan. Greta da antzezlaneko protagonista. Adineko emakume bat da Greta, eta makina magiko bat du alboan. Makina hori liburuz elikatzen da, eta egia bilakatzen ditu liburuen fantasiazko istorioak. Irakurtzeak duen garrantzia irudikatzea du helburu antzezlanak, eta, era berean, pertsona helduen zaintza ezinbestekoa dela nabarmentzea. Larunbatean, D'click zirku konpainiak Latas ikuskizuna egin zuen Lezo Herri Eskolako patioan. Potoz eta akrobaziaz bete zuten patioa.
Datozenak
Hurrengo ekitaldia ostiralean izango da. Bilboko ATX Teatroa konpainiak Marmarra antzeztuko du Lopene plazan. Beldurra da ostiralean ATX-ko aktoreek jorratuko duten kontzeptua: zer egiten dugu beldurrak bultzatuta?, zer egin dezakegu beldurrik ez izateko? Larunbatean, Bidaia galduak antzerkia jokatuko du Orratx Antzerki taldeak. Bi emakumeren bidaian oinarritzen da lana. William Shakespeare eta Federico Garcia Lorca idazleen emakumeek maleta hartu eta bidaia bat hasiko dute, bizipen bila. Igandean egingo dute asteburuko azken ikuskizuna: Argilunak. Dantza ikuskizuna izango da, Komorebi Produkzioak dantza taldearena.
Baina igandekoa ez da Kilometro Lezoko azken ekitaldia izango. «Jaialdiko azken eguna gure herriko Santakruz jaien azkeneko egunarekin batuko dugu. Irailaren 21ean, jaietako azken egunean, Kilometro Lezoko azken ikuskizuna izango dugu», esan du Salaberriak. El baile de la zurda dantza emanaldia aukeratu dute jaialdia ixteko. La Cerda dantza konpainiak egingo du. «Dantza, zirkua eta antzerkia uztartzea lortzen dugu jaialdi honen bitartez, eta, gainera, adin guztietakoei zuzendua».
