Irakurri serie honetako artikulu guztiak
Sagarrez eta Idiazabalgo gaztaz eginiko kroketak.
Gesaltza Añanako (Araba) Almazen jatetxeko Beatriz Pascualek egindako errezeta.
OSAGAIAK:
- Sagar gozo bat.
- Idiazabalgo gazta, 200 g.
- Sagardo naturala, 250 ml.
- Gurina, 50 g.
- Irina, 50 g.
- Esnea, 250 ml.
- Arrautza bat.
- Ogi birrindua.
- Olioa.
- Piperrauts beltza.
- Añanako gatza.
PRESTAKETA:
1. Zartagin batean gurina urtu, eta irina bota. Biak kozinatu, su ertainean, etengabe nahastuz.
2. Egindako oreari sagardoa gehitu, gutxinaka. Etengabe nahastu, orea gizendu arte, pikorrak atera ez daitezen.
3. Esnea gehitu, gutxinaka, orea krematsua bilakatu arte. Ondoren, gazta birrindu, eta beste denari gehitu. Dena nahastu, gazta urtu arte.
4. Sagarra kubo formetan moztu, eta orera gehitu. Gatza eta piperrauts beltza bota.
5. Orea ontzi batean isuri, eta bertan hozten utzi, gutxienez bi orduz. Horrela, gero errazagoa izango da maneiatzea.
6. Orea hoztean, bolatxo txikiak egin, kroketa formakoak. Horiek lehendabizi arrautzatik pasatu, eta, ondoren, ogi birrindutik.
7. Olioa berotu eta, ondoren, kroketak frijitu. Kolore aproposa dutenean, atera, eta sukaldeko paperaren gainean jarri, sobran dagoen olioa xurga dezan.
8. Azkenik, platereratu. Gainetik gazta gehitu edo sagar zati batzuk jarri, aurkezpena politagoa gera dadin.
Tagliatelleak sagarrarekin, barazkiekin eta curry ukituarekin
Kaxola Zaporeen Abiapuntua janari prestatuen zerbitzuetako (Beasain, Gipuzkoa) Iker Markinezek egindako errezeta.
OSAGAIAK:
- Tagliatelleak, 400 g.
- Bi sagar, golden motakoak.
- Zortzi gari zainzuri.
- Bi dozena cherry tomate.
- Hamabi txanpiñoi.
- Hiru berakatz ale.
- Ziazerba sorta txikia.
- Currya.
- Gatza.
- Piperrauts beltza.
- Oliba olioa.
- Koilarakada bat gurin.
PRESTAKETA:
1. Barazkiak prestatu: tomateak eta txanpiñoiak laurdenetan moztu; gari zainzuriak zuritu (erditik behera), eta lau zatitan moztu; berakatza zuritu, eta puska oso txikietan xehatu; sagarrak zuritu, bihotza kendu eta laukitxoetan moztu.
2. Gari zainzuriak lau minutuz erregosi zartaginean, oliba olio tanta batekin. Ondoren, erretiratu.
3. Zartagin berean txanpiñoiak erregosi. Txanpiñoiekin amaitzean, atera eta cherry tomateak sartu zartaginean, minutu batez. Cherryak atera.
4. Zartagin berean, berakatza bota, eta gorritzen hastean, aurretik erregositako osagai guztiak gehitu. Minutu batez bertan eduki, eta, ondoren, dena ontzi batera atera.
5. Zartagin berean, gurina eta sagar zatiak bota. Sua bizitu eta hiru minutuz erregosi, bi osagaiak nahasteko. Ondoren, beste osagaiak dauden ontzira bota. Ontzi horretan gatza eta piperrauts beltza bota, eta dena nahastu.
6. Lapiko handi batean ura, gatza eta currya jarri. Irakiten hastean, tagliatelleak gehitu, eta bertan egosi, zorroan jartzen duen denbora tartean. Egosi eta gero, tagliatelleak iragazi, eta egosteko erabilitako uraren baso bat gorde.
7. Lapiko handi batean, oliba olio txorrotada bat jarri, eta aurretik prestatutako barazkiak eta sagarrak bertan berotu. Ondoren, tagliatelleak gehitu, baita egosketako ura ere. Dena nahastu.
8. Platereratu, eta gainetik curry apur bat gehitu.
Labean erretako sagarrak, txokolatearekin eta jogurtarekin.
Amaia Castorene Baigorriko (Nafarroa Beherea) sukaldaritza blogariak eginiko errezeta.
OSAGAIAK:
- Lau sagar biologiko.
- Astigar edo agabe ziropa, koilarakada bat.
- Baso bat ur.
- Txokolate beltza (%70 kakao), 80 g.
- Jogurta, lau koilarakada.
- Tonka baba erdia edo banilla.
- Eztia, koilarakada txiki bat.
- Kanela (aukeran).
PRESTAKETA:
1. Sagarrak garbitu eta bihotza kendu. Labera sartzeko plater batean jarri.
2. Sagarrei txokolate laukitxoak sartu erdiko hutsunean edo inguruko mamian.
3. Ziropa kanelarekin eta urarekin nahastu, eta sagarren platerean gehitu, marian berotzeko moduan.
4. Sagarrak labean sartu, 20 minutuz 180 graduan.
5. Sagarrak labean dauden bitartean, jogurta, eztia eta tonka baba erraustua nahasi.
6. Sagarrak epelak daudenean, plater txikietan zerbitzatu, jogurt koilarakada bat ondoan jarrita.
