Hiru eguneko grebari ekingo diote Petronorreko langile azpikontratatuek. ELA, UGT, CCOO, LAB eta ESK sindikatuek egin dute grebarako deia, argudiatuta lan baldintzak txarrak direla eta enpresa kudeatzaileek ez dutela horiek hobetzeko borondaterik. Abenduaren 1ean, 2an eta 3an egingo dute lanuztea.
Azpikontratatutako langileek pisu handia dute Muskizko (Bizkaia) findegian. Hain zuzen, enpresako langileen %61 dira azpikontratatuak: mila langile inguruk egiten dute lan findegian Petronorrek kontratatuta, eta 1.500 inguruk azpikontratatuta.
Sindikatuen arabera, findegian azpikontratatuta aritzen diren langileek urteak daramatzate oso baldintza gogorretan lanean, eta orain salatu dute are gehiago okertu dela haien egoera. Esaterako, 25 egun baino gehiago daramatzate aldageletan ur berorik gabe. «Findegi batean lan egiten dutenek, industria jarduera zorrotz baten berezko arriskuen eraginpean daudenek, ez dute ur beroa bezain oinarrizkoa den zerbait ere», salatu dute sindikatuek.
Hala Petronor nola enpresa kontratistak jo dituzte egoeraren erantzuletzat, argudiatuz ardura elkarren bizkar uzten dutela eta ez dutela ezer egiten egoera konpontzeko. «Beren ardurak onartu behar dituzte. Findegiaren aberastasuna ezin da azpikontratetako langileen prekaritatearen gainean eraiki».