Hiru greba egun deitu dituzte Petronorreko azpikontratatutako langileek

Abenduaren 1etik 3ra egingo dute greba, lan baldintza hobeak exijitzeko. Findegiko langileen %61 inguru dira azpikontratatuak, 1.500 inguru.

Petronorreko Muskizeko findegia, artxiboko irudi batean. ARITZ LOIOLA / FOKU
Petronorreko Muskizeko findegia, artxiboko irudi batean. ARITZ LOIOLA / FOKU
Igor Baigorri Perez (2)
2026ko azaroaren 18a
12:05
Entzun 00:00:00 00:00:00

Hiru eguneko grebari ekingo diote Petronorreko azpikontratutako langileek. ELA, UGT, CCOO, LAB eta ESK sindikatuek egin dute grebarako deia, argudiatuta lan baldintzak txarrak direla eta enpresa kudeatzaileek ez dutela horiek hobetzeko borondaterik. Abenduaren 1, 2 eta 3an egingo dute greba.

Azpikontratatutako langileek pisu handia dute Musikizeko (Bizkaia) findegian. Hain zuzen, findegiko langileen %61 inguru dira azpikontratatuak: 1.000 langile inguruk egiten dute lan findegian Petronorrek kontratatuta, eta 1.500 inguruk azpikontratatuta.

Sindikatuen arabera, findegian azpikontratatuta aritzen diren langileek urteak daramatzate oso lan baldintza gogorrak jasaten, eta orain, salatu dute are gehiago okertu dela haien egoera: 25 egun baino gehiago daramatzate aldageletan ur berorik gabe. «Findegi batean lan egiten duten pertsonek, industria jarduera zorrotz baten berezko arriskuen eraginpean daudenek, ez dute ur beroa bezain oinarrizkoa den zerbait ere», salatu dute sindikatuek.

Hala Petronor nola enpresa kontratistak jo dituzte egoeraren erantzule, argudiatuz erantzukizuna batak bestearen bizkar uzten dutela eta ez dutela ezer egiten konpontzeko. «Beren erantzukizunak onartu behar dituzte. Findegiaren aberastasuna ezin da azpikontratetako langileen prekaritatearen gainean eraiki».

Kazetaritza etikoaren arabera sortua

Nola bermatzen dugun edukien kalitatea

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Zure babes ekonomikoari esker egiten dugu kazetaritza konprometitua. BABESTU BERRIA