Saint Gobainek Berriobeitiko langileak kaleratu nahi ditu, eta, orain, lan erregulazioko espedientea negoziatzen ari da sindikatuekin. Langileek greba egin zuten asteartean, eta orain iragarri dute mobilizazio gehiago egingo dituztela. Urriaren 29an eta azaroaren 6an, 13an eta 14an lau orduko lanuzteak egingo dituzte txanda bakoitzean.
Aldeen arteko elkarrizketa egunetan egingo dituzte lanuzte horiek. Gainera, urriaren 30erako martxa bat antolatu dute Berriozarko sarreratik Nafarroako Parlamenturaino; han elkarretaratze bat egin, eta alternatiba bat bilatzeko eskatuko dute. Kaleratzeez bestelako irtenbide bat nahi dute.
Batzordeak ohartarazi du ez dutela baztertzen mobilizazio gehiago egitea «baldin eta negoziazioak blokeatzen badira». Urriaren 16an eta herenegun bildu ziren zuzendaritzarekin. Sindikatuek eskatu dute espedientea atzera botatzeko eta sei hilabeteko epea emateko kaleratzeez bestelako proposamen bideragarri bat bilatzeko. Salatu dute zuzendaritzak ez duela aintzat hartu eskaera.
Berriobeitiko lantegia 1967koa da. AEBetako enpresa batek eraiki zuen, Nortonek hain zuzen, produktu urratzaileak egiteko. Konpainia hura, ordea, Frantziako Saint Gobainek erosi zuen 1990ean, eta, harekin batera, Berriobeitiko fabrika ere bai. Enpresa historikoa da Saint Gobain, 1665. urtean sortu baitzuten, beira egiteko. Gaur egun 63 lantoki ditu denera, eta 10.500 langile inguru.
