CAFek Taipei Berria hirian zerbitzua emango duten 23 tranbia egingo ditu Malaysiako Gamuda Berhardentzat. Enpresa hori eraikitzen ari da Taipei Berriko tranbia. Kontratuak, tranbiaz gain, ordezko piezak, gordailu ekipoak eta gidatze simulagailu bat jasotzen ditu.
Taipei Berria Taiwango udalerririk handiena da, eta 4 milioi biztanle inguru ditu. CAFen unitateak tranbia sare berriko lehen linean arituko dira, Xizhi-Donghu (Xidong). Urbos modelokoak izango dira, eta bakoitzak bederatzi bagoi izango ditu, 55 metro ingurukoak. Tranbia bakoitzak gehienez 615 bidaiari garraiatuko ditu.
Beasaingo (Gipuzkoa) tren ekoizleak Taiwanen duen bigarren proiektua da. Lehena Kaohsiung hirian abiatu zuen, herrialdeko hegoaldean. Katenariarik behar ez duen munduko lehen tranbia linea eraiki du han, 8,6 kilometrokoa, eta han aritzen diren tranbiak ere harenak dira. Teknologia horri esker, geltokietan dauden bitartean jasotzen dute karga.
