Iberdrola Finlandian lurreratu da. Caruna argindar-banaketa enpresaren baliabide propioen %80 bereganatu ditu, 2.015 milioi euroren truke. Finantza zorra aintzat harturik, enpresaren %100 5.000 milioi euroren bueltan baloratu du argindar konpainiak.
Ontario Teachers Kanadako pentsio funtsari eta AEBetako KKR inbertsio funtsari erosi dizkie akzioak. Ontario Teachersek Kanadako Ontario probintziako irakasleen erretirorako diruak kudeatzen ditu. Gainerako %20k AMF eta Elo Finlandiako pentsio funtsen eskuetan jarraituko du.
Iberdrolak 1.014 milioi euro aurreratuko ditu, eta ondorengo 30 hilabeteetan pagatuko ditu beste 1.000 milioi euroak.
Carunak milioi bat eta erdi finlandiarri banatzen die argindarra, herrialdeko biztanleen %20 ingururi. 89.000 kilometroko garraio sarea du herrialdean, bi heren lurpean. Batik bat Helsinki hiriburua hornitzen du, eta industria jarduera handiko eskualde bat, Joensuu. Hain zuzen ere, eremu horretan asko handitu da argindar eskaria, datu zentro berrien eraginez.
Ignacio Sanchez Galan Iberdrolako presidentearen arabera, operazioak «sendotu egiten du argindar sarearen aldeko apustu estrategikoa». Haren irudiko, funtsezko azpiegiturak dira segurtasun energetikoa eta lehiakortasuna bermatzeko. «Finlandiak kreditu kalitate handia du, eta haren araudia erakargarria da, aurreikusten erraza. Carunak hazteko aukera handia du, sareak behar baitira energia berriztagarriei eta industriaren eta etxebizitzaren beharrei erantzuteko».
