ELAk agerraldi bat egingo du bihar Bilbon, bere erabakiaren berri emateko. Joan den astean, beste sindikatuek eta patronalak jakinarazi zutenean hitzarmena berritzeko testua adostu zutela, Mitxel Lakuntzaren sindikatuak denbora gehiago eskatu zuen akordioa aztertzeko. Baina, aldi berean, esan zuen beste sindikatuek galdu egin zutela «hitzarmen hobeago bat lortzeko aukera».
ELAk du ordezkaritza gehien Bizkaiko metalgintzako 50.000 langileen artean, baina, beste hiru sindikatu nagusien batuketak ordezkarien erdia gainditzen duenez, hitzarmena langile guztiei aplikatuko zaie.
Sindikatu sinatzaileek nabarmendu dute hitzarmen berriak berritasun «historiko» bat duela: fabriketan mantentze lanak egiten dituzten langile subrogatuek gainontzekoen lan baldintza berak izango dituzte.
Eusko Jaurlaritzak eta Unai Rementeria Bizkaiko ahaldun nagusiak txalotu egin dute hitzarmenerako akordioa.
Honako hauek dira hitzarmenerako aurreakordioan jasotako puntuak:
—Subrogazioa mantentzea egiten duten langileentzat.
—Berdintasun batzorde bat sortzeko, berdintasun planak egiteko eta kontratazioan generoa ez kontuan izateko konpromisoa.
—Dualtasunaren eta estatalizazioaren aurkako neurriak.
—Behin-behinekotasunari mugak ezartzea.
—Kontratazio zuzena bultzatzea, aldi baterako laneko enpresen bidez eginiko kontratuak murrizteko.
—Lan osasunaren galera murrizteko neurriak.
—Soldatei dagokienez, 2019rako KPIa gehi %1,75eko igoera; eta 2020. eta 2021. urteetarako, KPIa gehi 1,5ekoa.
