Errenteriako (Gipuzkoa) Papresa paper fabrikaren etorkizuna argitzeko bidean da. Enpresa borondatezko hartzekodunen konkurtsoan sartu da. Langile batzordeko kideek jakinarazi dutenez, Donostiako merkataritza arloko epaitegiaren jakinarazpena jaso dute gaur, eta bertan enpresa erosteko eskaintza bat agertzen da. Espainiako CL Group (Cristian Lay) talde industrialak baieztatu du eskaintza hori berea dela, eta zehaztu du erosketa proposamenaren helburua Papresaren bi jarduera nagusiei eustea dela: batetik, bilgarri eta paketatze jarduerari, eta bestetik, prentsa paperaren ekoizpenari.
Talde horrek lehenago ere aurkeztu zuen erosketa proposamen bat, enpresa konkurtsoan sartu aurretik; orduan, ordea, lantaldearen erdia kaleratzea eskatu zuen, 110 langile inguru.
Langile batzordeko kideen iritziz, konkurtsoan sartzea «albiste ona» da, enpresaren jarduerari jarraipena emateko aukera irekitzen duelako. Hala ere, azpimarratu dute oraindik ez dakitela zein diren CLren proposamenaren xehetasunak, eta horregatik ezin dutela beste baloraziorik egin.
Enpresaren bideragarritasuna eta urteetan pilatutako zorra izango dira hartzekodunen konkurtsoaren giltzarri nagusiak. Papresak berrehun langile inguru ditu gaur egun, eta hamarkadetan Gipuzkoako industria sareko enpresa nabarmenetako bat izan da, baina garai zailean dago, sektoreko krisi estrukturalagatik eta energiaren prezioen garestitzeagatik.
Lanpostuak arriskuan
Konkurtsoa abiatuta, enpresaren kontrola kendu diote egungo jabeari, Alemaniako Quantum Capital Partners inbertsio funtsari, eta administratzaile bat izendatu dute. Hemendik aurrera, haren esku egongo da kudeaketa, baita salmenta prozesua ere, halakorik bada. El Diario Vasco-k aurreratu duenez, Zumaiako (Gipuzkoa) Astilleros Balenciaga ontziolaren salmentan parte hartu zuen bulegoak hartuko du ardura hori.
Papresa iazko udatik zegoen konkurtso aurrekoan. Ordutik, zuzendaritzak ez du lortu finantza egoera egonkortzeko edo inbertitzaile sendo bat erakartzeko akordiorik egitea. Urte amaieran, CL taldeak enpresa erosteko interesa agertu zuen. Hasieran, ontziratze eta paketatze jarduera bakarrik eskuratzeko eskaintza egin zuen; geroago, prentsa paperaren ekoizpen lerroa ere erosteko aukera gehitu zuen. Hala ere, operazioa aurrera eramateko baldintza gisa enplegua erregulatzeko espediente bat eskatu zuen, 110 langile kaleratzea aurreikusten zuena.
Proposamen horrek langileen erantzun gogorra eragin zuen, eta mobilizazioak eta lanuzteak egin zituzten. CL kaleratze kopurua murrizteko prest agertu zen, baina akordioa hurbil zegoela zirudielarik, prozesua berriz ere trabatu zen. Duela hilabete inguru, enpresa batzordeak salaketa publikoa egin zuen, eta zuzendaritzari «blokeo sistematikoa» leporatu. Langileen ordezkariek zuzenean seinalatu zuten enpresako zuzendari nagusia, Miguel Sanchez, negoziazioa oztopatzen ari zela esanez.
Konkurtsoa, azken aukera
Konkurtso prozesua abiatuta, zorraren hartzekodunek —batez ere bankuek— hamabost eguneko epea izango dute epaitegian euren eskubideak defendatzeko. Konkurtso administratzaileak enpresaren egoera ekonomikoa aztertu beharko du, eta ondoren bideragarritasun plana edo likidazio proposamena aurkeztu.
Enpresaren zorra izango da giltzarri nagusietako bat: erosleak enpresa bere gain hartu nahi badu, zor horren zati bat bere gain hartu beharko du, edo bestela bankuekin akordio bat lortu. Duela urtebete, bankuek 40 milioi euro inguruko zorra birfinantzatu zuten.
Sektorearen egoera ere funtsezkoa izango da prozesuan. Papergintzak pisu handia izan du historikoki Euskal Herrian, baina azken bi hamarkadetan gainbehera nabarmena izan du, batez ere prentsa paperaren segmentuan. Digitalizazioak eta kontsumo ohituren aldaketek eskaria nabarmen murriztu dute.
Energiaren kostu handiek eta lehengaien prezioen gorakadak ere kolpe handia eman diete ekoizleei. Horren ondorioz, hainbat planta itxi edo jarduera eraldatzera behartu dituzte. Egoera horretan, azken urteetan jarduera dibertsifikatzen saiatu da Papresa, ontziratze sektorean indarra hartuz, baina ez du lortu finantza arazoak gainditzea.
1957an sortua, Papresak 300.000 tona paper inguru ekoizteko gaitasuna izan du urte luzez, eta erreferente izan da prentsa paper birziklatuan.
