2024ko martxoaren 14an, zama gainera erori zitzaion 25 urteko garraiolari bati, Eskoriatzan (Gipuzkoa). Lan istripuak zauri larriak eragin zizkion, eta apirilaren 9an hil zen. Eibarko (Gipuzkoa) Instantzia Auzitegiko Gizarte Arloko Atalak lau enpresa zigortu ditu langile horren heriotzagatik, CCOO sindikatuak jakinarazi duenez: Orixol Garraioak, Azkamsa, Areazka eta Fagor Ederlan.
Hildakoa Orixol Garraioak enpresako langilea zen. Zama deskargatzen ari zen Fagor Ederlan enpresarentzat, TKV Logistica enpresan, Eskoriatzan. Kamioiaren kutxako atea zabaldu, eta gainera erori zitzaizkion metalezko bobinak. Bobinek buruan jo zuten, eta Gasteizko Txagorritxuko ospitalera eraman zuten. Egun batzuk geroago, hil egin zen.
CCOOrentzat, epaiak «askatu» egin du lan heriotza horren atzean dagoen «azpikontratazio kate konplexua»: Fagor Ederlanek Azkamsa kontratatu zuen logistikaren kudeaketa egiteko; Azkamsak, Orixol Garraioak, materiala garraiatzeko; eta Azkamsak, Areazka 2014, zama kargatzeko eta deskargatzeko. Epaiaren arabera, enpresa horietako bakar batek ere ez zuen egin «koordinazio lan errealik eta eraginkorrik».
Sariak baino %30 gehiago
Ezta legez azpikontratazio kateetarako aurreikusitako «lan arriskuen prebentziorik ere». Enpresek dokumentazioa bidali zioten elkarri, baina auzitegiak uste du ez zela nahikoa izan. Fagor Ederlanek informazioa jaso zuen bobinak pilatzeko eta garraiatzeko moduaz —bobinak ez zirela pilatu behar, besteak beste—, baina lan istripua gertatu eta sei egunera jakinarazi zion Azkamsari. Beraz, Orixol Garraioak eta Areazka 2014 enpresek, azpikontratatu zituztenean, ez zuten informazio hori. Auzitegiak lan baldintzak ez kontrolatzea egotzi dio Orixol Garraioak enpresari.
Ondorioz, lau enpresek lan istripuaren erantzukizun partekatua dutela ebatzi du. Enpresek Gizarte Segurantzak ezarritako sariak baino %30 gehiago ordaindu beharko diete hildako langilearen senideei.
