Lau hilabeteren buruan, belztu egin dira munduko ekonomiaren gaineko hodeiak, eta arrazoi nagusi ageriko bat dago: AEBek eta Israelek Iranen aurka abiatutako gerra. Munduko ekonomia %3,1 handituko dela uste du Nazioarteko Diru Funtsak, urtarrilean iragarri baino bi hamarren gutxiago. Funtsean, inflazioak galgatuko du hazkundea; KPIa %4,4ra helduko dela uste du.
Udaberriko txosten ekonomikoa kaleratu du nazioarteko erakundeak (World Economic Outlook), eta hiru jokaleku nagusi marraztu ditu. Gerrak zenbat eta gehiago iraun eta Persiar golkoko azpiegitura energetikoak zenbat eta gehiago hondatu, aurreikuspenak orduan eta gehiago okertuko dira. Hau da, oraintxe hipotesirik baikorrena betetzea espero du. Aldiz, hipotesirik ezkorrenean, inflazioa %6ra helduko litzateke, eta ekonomia nabarmen hoztuko litzateke —%2ko hazkundea kalkulatu du, kasu horretan—.
Aurretik, egiaz, ez zegoen bereziki baikor. Donald Trump AEBetako presidenteak iaz abiatutako merkataritza gerraren eragina nabari zen urtarrilean NDFk egindako azterketan, baina bederen inbertsio teknologikoek, dolar merkeak eta finantza baldintza leunagoek baikortasun pixka bat ematen zioten egoera makroekonomiko orokorrari. NDFk ohartarazi du gorabidean diren herrialdeei kolpe «bikoitza» emango diela gerrak.
Eurogunea, motelago
Eurogunean, ekonomia batez beste %1,1 haztea espero du NDFk, iaz baino lau hamarren gutxiago. Alemania (%0,8) eta Frantzia (%0,9) antzera haziko dira, eta Espainiako ekonomia bizkorrago handitzea espero du (%2,2).
Europatik kanpo, Estatu Batuak %2,3 haztea espero du, iaz baino bi hamarren gehiago. Txinako ekonomia, berriz, %4,4 haziko litzateke, iaz baino sei hamarren gutxiago.
