Azkenean eman du iritzia. EH Bilduk eta Geroa Baik gutxieneko soldata propioari buruz aurkeztutako lege proposamenak bultzatu egin du Nafarroako Gobernua bere ikuspegia azaltzera. Nafarroako Parlamentuari bidalitako idatziaren arabera, gobernuak ez du begi onez ikusten ekinaldia, irizten baitio «lurraldeen arteko desberdintasunak» areagotuko lituzkeela. Horrek diru sarrera apaleko langileen artean duen eraginari erreparatu gabe, gobernuak dio Espainiako Estatuaren eskumena dela soldata arautzea.
Berez, Iñaki Mendioroz Eskubide Sozialen eta Enpleguaren Arloko zuzendariak sinatu du idatzia, eta EFE albiste agentziak zabaldu du haren berri. Kontuan hartu behar da Geroa Bai Nafarroako Gobernuaren parte dela, eta Nafarroako erosahalmenaren araberako gutxieneko soldata propio bat zehaztearen aldekoa dela. Aitzitik, Eskubide Sozialen Departamentua PSNren eskuetan dago, eta Carmen Maeztu kontseilariaren organigramako zuzendarietako bat da Mendioroz.
Idatziaren arabera, estatuak arautu ohi duen oinarrizko legediaren muinaren parte da gutxieneko soldata. Gaineratzen duenez, Espainiako Konstituzioaren 149.7 artikuluan estatuaren eskumenen artean sartzen da lan arloko legedia, eta Nafarroako Foru Hobekuntzak zehazten du Nafarroaren eskuetan dagoela estatuko araudia gauzatzea.
Autogobernuari berari dagokion eztabaida alde batera utzita ere, Mendiorozek azpimarratzen du gutxieneko soldata propioa ezarriz gero balitekeela pertsonen eta enpresen mugimenduari eragitea, bai eta lurraldeen arteko lehiakortasunari ere. «Gutxieneko soldata bakarra izateak eragotzi egiten du lurraldeen arteko zuzeneko eta zeharkako bereizkeriak izatea».
Geroa Baik prentsaurrekoa egin du goizean Iruñean, eta Uxue Barkosek adierazi du PSN «erratuta» dagoela. «Lanean jarraituko dugu, indar handiagoz, hori aldatzeko».
