Hego Euskal Herriko sindikatuek Palestinaren aldeko elkartasun eguna antolatua dute biharko. Bake negoziazioak hasiak badira ere, lanuzteei eta mobilizazioei eutsi diete guztiek. ELA sindikatuak lau orduko lanuzte deialdiak egin ditu; beste sindikatuek, berriz, (LAB, CCOO, UGT, ESK, Steilas, CGT, Etxalde eta HIRU) hiru orduko etenak egitera deitu dute. Salbuespena hezkuntza sektorea da, egun osoko deialdia egin baitute bertan. BERRIAk bat egin du deialdiarekin, eta zuzenean emango du lanuzteen berri.
1
Noiz egin behar da greba?
ELAren deialdiarekin bat eginez gero, hauek dira lanuzte ordutegiak txandaren arabera: 03:00etatik 07:00etara —industriako ohiko txandetan, 02:00etatik 06:00etara—; 11:00etatik 15:00etara —industrian, 10:00etatik 14:00etara eta 18:00etatik 22:00etara—. Beste deialdiarekin bat eginez gero, berriz, hauek dira ordutegiak: gaueko txandan, 03:00etatik 06:00etara; goizeko txandan, 11:00etatik 14:00etara; eta arratsaldeko txandan, 19:00etatik 22:00etara. Bietan, txanda bakoitzeko amaierako orduetarako egin dute deialdia.
2
Hezkuntza, salbuespena
Hezkuntza da salbuespena, publikoa zein pribatua, eta maila guztietan: haur eskoletatik unibertsitateraino. Sektore horretan egun osoko grebara deitu dute, eta langile guztiak daude deituta: irakasleak, hezkuntza bereziko irakasleak, jangeletako langileak, gidariak... Ikasle sindikatuek ere bat egin dute deialdiarekin. Eusko Jaurlaritzak ohiko zerbitzu minimoak izendatu ditu, eta zentro guztiak irekita egongo dira.
3
Mobilizazioak, non eta noiz?
Asko dira. ELAk 11:30ean antolatu ditu hiriburuetan, eta 12:00etan (Zarautz, Azpeitia, Tolosa eta Beasain) eta 12:30ean (Durango, Gernika eta Eibar) hainbat herritan. Beste sindikatuek, berriz, 12:30erako deitu dute hiriburuetako mobilizazioetara, eta arratsaldean egingo dute protesta herri handienetan, 19:30ean. Iruñea izango da bi mobilizazio izango dituen hiriburu bakarra, beste batera deitu baitute arratsalderako (18:30).
4
Eskariak
Bi deialdiek antzeko eskari eta argudioak dituzte. Bat egiten dute Palestinako langileei egin beharreko elkartasun keinuekin, eta, besteak beste, sarraskia amaitzeko eta bidezko akordio bat egiteko eskatzen dute. Halaber erakunde publikoei eskatzen diete Israelekin eta hango enpresekin duten harreman oro eteteko.
5
Gutxieneko zerbitzuak
Eusko Jaurlaritzak dagoeneko zehaztu ditu lanuzteetan egongo diren gutxieneko zerbitzuak. Osakidetzan jai egunetako zerbitzua emango da gutxienez, eta ez du eraginik izango larrialdietan, dialisietan eta tratamendu onkologikoetan. Zaharetxeetan %50eko eta %70eko zerbitzuak ezarri ditu, artatu beharreko pertsonen menpekotasun mailaren arabera. Garraio publikoan zerbitzuen %30 egongo dira eta Zuzenean sareko bulegoetan gutxienez pertsona bat egongo da bulegoko.
