LAB, ESK, Steilas, EHNE-Etxalde eta Hiru sindikatuek elkarretaratzea egin dute gaur Iruñean, asteazkenean Erriberrin (Nafarroa) izandako lan istripuan hil zen 38 urteko garraiolaria gogoratzeko: haren kamioia errepidetik atera eta irauli egin zen A-15 autobidean. Langileen erakundeek aipagarritzat jo dute ezbeharra goizaldeko lauretan gertatu izana: «Gauez lan egiteak arriskuak ditu: neke handiagoa izaten da, erreflexuak gal daitezke, eta, ondorioz, istripuren bat izateko arriskua handitu egiten da», salatu dute. Horiek horrela, patronala eta erakunde publikoak egin dituzte heriotzaren erantzule. ELAk ere kontzentrazioa egin du Nafarroako hiriburuan. Bestalde, atzo Iruñeko Landaben industrialdeko Volkswagen lantegian izandako heriotza lan istriputzat jo dute sindikatuok.
Erlazionatuta
«Patronalak eta instituzioek gaixotu eta hiltzen gaituzte; prekaritateak hil egiten gaitu» idatzita zeraman pankarta baten atzean egin dute elkarretaratzea LAB, ESK, Steilas, EHNE-Etxalde eta Hiru sindikatuek, 10:30ean, Nafarroako Parlamentuaren eta Lan Ikuskaritzaren aurrean, Iruñeko Sarasate pasealekuan. Asteazkeneko lan heriotza txarrestearekin batera, martxoaren 5ean gertatutako istripu tragikoa gogoratu dute: Erriberritik ez oso urrun, goizaldeko laurak inguruan, lau garraiolari hil ziren Iruñetik Madrilerako N-113 errepidean, Fitero parean, bi kamioik elkar jota. Ibilgailu bakoitzean bi lagun zihoazen.
Sindikatuek adierazi dutenez, «enpresek askotan urratzen dute laneko osasun eta segurtasun araudia. Administrazioak, ordea, ez ikusi egiten du, eta ez ditu beharrezko neurriak hartzen arazoari aurre egiteko». Bada, gogorarazi dute aurten Euskal Herrian dagoeneko hamalau garraiolari hil direla: «Errepidean lanean edo ibilgailuko kabinan zain zeuden». «Estatistika dramatikoa da: hilean garraiolari bat baino gehiago hiltzen da. Aurtengo abuzturako, iaz hamabi hilabetean adina garraiolari hil dira lan istripuetan», nabarmendu dutenez.
