Berrogeita bost segundoro ibilgailu bat ateratzen da VW Nafarroako muntai katetik. Gaur ofizialki ID Cross modelo elektrikoa aurkeztu du enpresak, eta horrenbestez ongietorria egin dio garai berri bati. Michael Hobusch VW Nafarroako presidentearen hitzetan, «egokitzeko gaitasunari esker etorkizunari aurre egiteko prest da Lanbengo fabrika», eta 60 urteko ibilbidean «mugarri historikotzat» jo du lorpena.
Izan ere, lantokia ibilgailu elektrikoaren produkziora egokitzeko «mila milioi eurotik gora» inbertitu ditu Volkswagenek. Hala, gaur egun plataforma bakar batean segidan eta elkar nahastuta ekoizten dituzte konbustio motorreko bi modeloak —Taigo eta T Cross— eta bateria elektrikoko beste bi modeloak —Skoda Epiq eta ID.Cross—. «Munduan oso fabrika gutxik egin dezakete hori», azpimarratu du Thomas Schaefer VW taldeko zuzendaritza batzordeko kideak eta VW markako kontseilari ordezkariak.
Aurkezpenean, Volkswagen taldeak fabrikaren eraldatzeko eta «bere burua berrasmatzeko» gaitasuna aitortu ditu. Plataforma berean lau modelo diferente egiteko aukera apustu eta erronka zaila izan direla azaldu du Miguel Angel Grijalba Landabengo ekoizpen zuzendariak, baina malgutasun horri esker merkatuaren beharrei eta gorabeherei aurre egiteko gai direla uste du. «Uneotan merkatuak nola erantzungo duen giltzarria da», zehaztu du.
Auto elektrikoen salmentak apurka gorantz ari badira ere, gaur egun Landabenen 1.438 ibilgailu ekoizten dira, eta horietatik 350 dira elektrikoak. Irail hasietarik ari dira ID.Cross modeloko automobilak egiten, eta ofizialki gaur aurkeztu badute ere, asmoa da urtean produkzioa «bikoiztea».
Aurkezpen ofiziala
Gaur Nafarroako Gobernuko ordezkariei eta komunikabideei aurkeztu diete ID.Cross. VWeko goi agintarien artean izan dira Michael Hobusch, Thomas Schaefer, Andre Klab VWen Iberiar penintsulako ekoizpen arduraduna eta Alfredo Morales langile batzordeko presidentea. Nafarroako Gobernuaren ordezkari gisa, han izan da Maria Txibite Nafarroako Gobernuko lehendakaria, Mikel Irujo Industria kontseilaria eta Carmen Maeztu Enplegu kontseilaria.
VWeko goi kargudunek goraipatu dute eraldaketa ez dela soilik ekonomiko eta produktiboa izan: «Pentsamoldea ere aldatu behar izan dugu», gaineratu du Schaeferrek. Langile guztiei eta «langile batzordearen gehiengoari» eskerrak eman dizkie akordioak lortzeko gaitasunagatik, UGT eta CCOO sindikatuei erreferentzia eginez.
Albiste ona testuinguru zail baten erdian egin du enpresak, VW taldeak Alemanian fabrikak ixteko eta milaka langile kaleratzeko asmoa iragarri baitu. Hori gogoan, Alfredo Moralesek onartu du «etorkizuna zaila» izan daitekeela. CCOOko ordezkariaren prestasuna ere goraipatu du, batzordeko gainerako hiru sindikatuak zeharka kritikatuz: «Volkswagen Nafarroak fabrika gatazkatsua izateari utzi dio. Gaur elkar ulertzen garen, elkarrekin negoziatu eta adosten dugun fabrika gara. Arazo bat datorrenean konponbide bat bilatzeko gai gara». Zailtasunak zailtasun, etorkizunean jarrera hori izateko asmoa promes egin du. «Bederen gu hemen gauden bitartean».
(Jarraian gehiago)
