* Iruñerrian sartu da Korrika, eta Iruñetik pasako da 11:48an eta eguerdian zehar. Gauean Lizarrara joango da.
* Nondik eta noiz igaroko da 24. Korrika?
12:20, Burlata
Burlatara iritsi da 24. Korrika. Jendea ikusten da, banderak ikusten dira, baina ez da ikusten jendetzaren amaiera. Burlatako alkateak darama lekukoa, eta Larratz dantza taldekoei eman die. Dantzariz jantzita doaz, eta irribarretsu eraman dute lekukoa. Gero, dantzariek Sahararrak elkartekoei eman diete. Euskal Herria Peña eta Miguel Rubio ere joan dira aurrean.
Ezin hobea da eguraldia Iruñerrian. Orokorrean, 24. Korrika osoan ederra izan da eguraldia. Zeruak horrela jarrai beza.
11:58, Iruñea
Txantreako auzora itzuli da Korrika. Akelarre kultur elkartekoek ta Txantreako errepresaliatuek lekukoa hartu dutenean, lehengo erritmoa ezarri dute eta korrika hasi dira. Jarraian, Maiatzak 1 gaztetxeko kideei eman diete lekukoa, eta gaztetxekoek Bernart Etxepare ikastolako ikasle, irakasle eta langileei. Gaztetxeen alde abestu dute korrikalariek: «Gaztetxeak aurrera!».
Beste bi ikastetxeetako ikasle eta langileek hartu dute lekukoa: Izartegi haur eskolak eta Eunate ikastetxeak. «Eskerrik asko gure hezitzaileei hainbeste urtetan euskaraz bizitzeagatik eta gure umeak euskaraz maitatzeagatik!» eskertu die mikrofonoa daraman kideak Izartegiko irakasleei.
Harrera beroa dute Korrikarentzat. @berria pic.twitter.com/bCTppxoibQ
— Irati Urdalleta (@UrdalletaIrati) March 22, 2026
11:40, Antsoain
Iruñea utzi du Korrikak, baina laster itzuliko da Nafarroako hiribura. Antsoainen dabil orain, eta Antsoaingo Korrika batzordeko kideak daude aurrean. Ondoren, Antsoaingo Udaleko eta Ezkaba ikastetxe publikoko langileei eman diete lekukoa. Lekukoa eraman duten hurrengoak Sare eta Etxerateko ordezkariak izan dira, eta «denak etxera» itzultzea aldarrikatu dute. Oinez egin dute azken kilometroa, eta ia hamar minutuko atzerapenarekin iritsi dira berriro Iruñera.
Atarrabian sartu denetik jendea etengabe batzen doa, eta herritarrak espaloiean itxaroten daude lasterketara sartzeko. Milaka pertsona daude.
11:30, Iruñea
Lehenengo aldiz sartu da 24. Korrika Iruñean. Txantrea auzoan sartu dira, eta Euskal herriko Kontseilu Sozialistako, Txantreako jai batzordeko eta Txantrean Auzolan aldizkariko kideek daramate lekukoa.
11:10, Atarrabia
Arreko kaleak igaro ostean, Atarrabiara iritsi da 24. Korrika. Joaldunek eman diote ongi etorria Korrikari. Arren jada ez zen atzeko furgoneta ikusten, eta Atarrabian euskaltzale gehiago hasi dira korrika. Aurreko furgonetan ere ez dute ikusi jendetza non bukatzen den, eta eskuak gora altxatzeko eskatu die korrikalariei.
Harrera izugarria egin dio Atarrabiak #24KORRIKA ri pic.twitter.com/Mt8k1FDhvE
— AEK-KORRIKA (@AEK_eus) March 22, 2026
Ikastetxeak izan dira protagonista nagusi. Mendialdea II ikastetxeko langileek, Atargi eskola publikoko kideek eta San Frantzisko eskolako lagunek eraman dute lekukoa Ostiztik Atarrabiarako bidean, baita Ezkabarteko Korrika batzordeak ere. Atarrabiara iristean, Atarrabiako Udalak hartu du lekukoa. Milaka pertsona ari dira korrika, eta korrikalariei pankartaren atzean joateko eskatu die furgonetatik korrikalariei.
Hainbat elkartek hartu dute lekukoa: Atarrabiako Korrika batzordeak, Karrikaluze Paz de Ziganda ikastolak, Mugimendu Sozialistak, Atarrabiako Gazte Asanbladak eta beste hainbat eragilek eta kultur elkartek. «Euskara borrokan bizi da» lema duen pankarta daramate. Zuzenekoa hiru aldiz moztu da, jendetza korrika dabilen seinale.
10:05, Ostitz
Ostitzeko herritarrek harrera beroa egin diote Korrikari. Lehenengo, Ostizko Kontzejuak hartu du lekukoa, eta ondoren BDZ Nafarroa Palestinaren aldeko elkarteko kideei eman diete. «CAF, negoziorik ez genozidekin» leloa duen pankartaren atzean joan dira.
Gauean erritmoa igo dute, eta puntual dabil 24. Korrika. Iruñerrira iritsi da Korrika gauean. Mendigorria, Gares, Eneritz, Noain, Eskirotz, Zizur Nagusia, Barañain, Berriozar, Larraintzar zeharkatu ditu, besteak beste.
Momotxorroek egin digute harrera Barañainen! #24KORRIKA #EuskaraGara #Barañain pic.twitter.com/IzvN2qnTpO
— AEK-KORRIKA (@AEK_eus) March 22, 2026
