Kirol taldeetakoek, enpresetakoek, euskara taldeetakoek, eskolek, lagun kuadrillek, familiek... Askotariko taldeek eta norbanakoek eraman ohi dute Korrikaren lekukoa, eta, horretarako, ezinbestekoa da aurrez lekuko hartze bat eskuratzea; gaur zabaldu dute horretarako aukera aurrez Korrikan parte hartu izan ez dutenentzat —gainerakoek aurretik ere izan dute aukera—.
Ikusi gehiago
Martxoaren 19an abiatuko da Korrika, Atharratzen (Zuberoa): parez pare izango ditu 460 herri, 2.175 kilometro eta 3.436 lekuko hartze. Bada, lekuko hartze horietako baten bat eskuratu nahi duenak Korrikaren herrialdeetako bulegoetara jo behar du, edo haiekin kontaktuak jarri. Bost bulego dituzte: Baionan, Bilbon, Donostian, Gasteizen eta Iruñean.
AEKren asmoa da lekukoa eraman nahi dutenei lekua egitea. Hala nabarmendu zuen AEK-ko Nazio Kontseiluko ordezkari Maialen Begiristainek: «Berdin da zer jatorri, zein azal-kolore, euskararen inguruko nolako ezagutza... Garrantzitsuena da guztiontzako lekua dagoela, eta bertan, euskararen baitan, guztion artean eraikita, azkenean aurkituko dugula gizarte zapalkuntza orotatik babestuko gaituen komunitate berdinzale eta zabala, gure herrian, euskararen herrian, mundu oso bat sartzen baita».
Ekarpena
Orain bi urte Ane Elordik, Korrikaren atarian egindako elkarrizketan, ziurtatu zuen AEK-k Korrika ezinbestekoa duela aurrera egiteko: «Momentuz, AEK-k ezin du aurrera egin Korrika barik. Hori da errealitatea. Gure helburuetako bat ekonomikoa da, eta hori argi azaltzen dugu». Hots, Korrikak ematen dion babes ekonomikoa behar du AEK-k. Beraz, behar-beharrezkoa da herritarrek lekuko hartzeak eskuratzea; horretarako, 475 euroko ekarpena egin behar da gutxienez.
