«Ozen adierazi nahi diegu: zuekin gara, eta ibaitik itsasora Palestina libre izatearen aldeko aldarria zabaltzen segituko dugu». Iparraldea Palestinarekin kolektiboak «elkartasun mezu horrekin» jarraitzeko asmoa du, eta horretara deitu ditu euskal herritarrak oro, abenduaren 20rako manifestazioa antolaturik: Baionako geltokitik abiatuko da, 11:00etan, eta Lapurdiko hiriburuan barna ibiliko dira militanteak.
Prentsaurrekoa geltoki aitzinean berean egin dute gaur goizean, manifestazioa hasiko duten lekutik, hain zuzen. Segidan, azpimarratu dute heldu den larunbateko manifestazioak elkartasun mugimenduaren jarraikortasuna azpimarratuko duela, eta erran, batez ere, «hipokrita, inperialista eta kolonizatzailea» dela oraintxe bertan martxan dagoen bake akordioa. Hots, «Trumpek bideraturiko eta Nazio Batuen Erakundeak babesturiko» bake akordioa ez dela «inondik inora» bake sinbolo bat; «are gutiago askatasunaren eta burujabetzaren sinbolo». Adierazi dute palestinar lurren kolonizazioan egindako «urrats bat gehiago» besterik ez dela.
«Apartheid historikoaren» aipamena ere egin dute. Proiektu sionistaren gauzatzea Israelgo Estatuaren sorrerarekin lotu dute, 1948. urtean. Denboran jauzi bat egin, eta 2023ko gertakariak aipatu dituzte: «Proiektu sionistak palestinar herriaren garbiketa etnikoa du oinarrian, eta aitzina doa urratsez urrats. Bide horren parte dira 2023ko urriaren 7an abiaturiko genozidioa, azken hilabeteetan gogortu den Zisjordaniaren kontrako errepresioa eta kolonizazioa». Palestinarren erresistentzia azpimarratu dute, «urrats oro».
Eta Euskal Herrriko kolektiboa den heinean, horretaz jabetuta eta ardurak harturik mintzatu dira «Mendebaldeko erosotasun» jarreraz: «Kontsumismo garai honetan, ez gaitezen tronpatu: Mendebaldeko erosotasuna kolonialismotik dator». Hargatik, Ipar Euskal Herritik, hots, Mendebaldetik, nazioarteko elkartasun mugimenduan parte hartzera deitu dute. «Flotillarekin, Vueltarekin eta euskal selekzioa-Palestina partidarekin egin den gisara: antolatzeko gaitasuna badugu. Gure betebehar internazionalistari segi, sostengua adieraztea dagokigu».
Etenik gabe, boikota
Karriketan adieraz daitekeen sostenguaz beste, boikoterako deia berritu dute Iparraldea Palestinarekin kolektibokoek. Erraterako, «Mendebaldeko estatuek eta egiturek Israeli erakutsitako babes jasanezinarekin» lotu dute «elkartasun betebeharra». Uste dute, halaber, genozidioan parte hartzen duten enpresei boikota eginez eta Israelekin lotura guztiak mozteko presioa eginez antolatzen ahal dela erantzun kolektiboa.
BDZ mugimenduaren lana eraman dute aitzinera, boikota, desinbertsioa eta zigorrak planteatzen dituena. Mugimendu horrek dei egiten die pertsonei, enpresei eta erakundeei Israeldik datozen produktuak ez erosteko, baina baita Israelgo Estatuarekin finantzatuak diren edo lotura duten erakunde akademiko, kultural, kirol, sindikal eta elkarteekin loturak hausteko ere. Kanpainak zerrendatzen dituen zenbait enpresa ere izendatu dituzte: «Carrefour, Teva, Zara, Reebok, Ahava, Axa, Keter, SodaStream, Siemens, Coca Cola, Macdo, BNP, HP eta Microsoft».
Eta, nola ez, tokiko enpresak seinalatu dituzte, nazioarteko multinazionalak ez ezik, Ipar Euskal Herriko zenbait enpresak Israelekin harremanetan lan egiten dutelako. Batez ere, armagintzaren ekonomiaren logikan kokatzen diren zenbait aipatu dituzte, hala nola Lauak eta Dassault; erran dute garrantzitsua dela «Israelen apartheida eta genozidioa babesten duten enpresen boikota indartzea».
