Juan Mari Aburto Bilboko alkateak berretsi du ez zuela berak hartu 2027ko udal hauteskundeetan berriro hautagai ez izateko erabakia, EAJk baizik. Hala ziurtatu du igande honetan EITBko A un metro saioan emandako elkarrizketa batean. Bertan azaldu zuenez, ez du inoiz pentsatu alkatetza uztea, baina ez zuen ziurtzat jotzen udaleko buru izaten jarraitu behar zuenik.
Joan den ekainaren hasieran iragarri zuen Aburtok, 2015etik Bilboko alkatea denak, ez dela aurkeztuko 2027ko maiatzeko udal hauteskundeetara. Bi egun geroago, EAJk Mikel Hidalgo, 33 urtekoa, aurkeztu zuen hautagai. «Azken hilabete hauetan nirekin une askotan partekatu duen hausnarketa luze baten ondoren, EAJk erabaki du Bilbok lidergo berri bat behar duela datozen garaietarako. Erabaki hori nirekin partekatu dute, eta ni lankidetzarako prest agertu naiz», azaldu zuen orduan Aburtok.
Atzo emititutako A un metro telebista saioan, Aburtok aitortu zuen «arraro» sentitzen dela «bat-batean lehorrean gelditzeagatik»; baina, aitortu zuenez, ez du galdetu zergatik jarri duen EAJk konfiantza beste hautagai batengan, eta ez berarengan .«Ez nuen pentsatzen uztea, baina ez nuen pentsatu ere egin jarraitu behar nuenik. Egia da erabakia haiena izan zela, baina hausnarketa prozesua partekatua izan da», adierazi zuen.
«Nire ustez, umiltasuna ere erakutsi behar da ‘honaino iritsi gara’ esaten diguten unean; ‘plazer bat izan da’ eta ‘eskerrik asko’ esateko jarrera hori izatea beharrezkoa da»
JUAN MARI ABURTO Bilboko alkatea
EAJri erabaki horren «zergatia» galdetu ote zion ere jakin nahi zuen Juan Carlos Etxeberria aurkezleak. Aburtok, ordea, ezetz esan zion. «Ez dut galdetu zergatik. Alkate izateko proposatu zidaten egunean ere ez nuen arrazoia galdetu, eta nire buruari proposatu nion alde egin behar nuen egunean ere ez nuela galdetuko», azaldu zuen alkateak. «Nire ustez, umiltasuna ere erakutsi behar da ‘honaino iritsi gara’ esaten diguten unean; ‘plazer bat izan da’ eta ‘eskerrik asko’ esateko jarrera hori izatea beharrezkoa da», gehitu zuen.
Ildo berean, Aburtok zera adierazi zuen: «Alkatetzan 12 urte eman ondoren eta kargu hori 66 urterekin utzita, normaltasunez ikusi behar da aldaketa hori gertatzea. Niretzat ohore handia izan da Bilboko alkate izatea».
Osasun arazoak
Udal agintari jeltzaleak, halaber, azken urteetan izan dituen osasun arazoei buruz hausnartu zuen: «Gaizki pasatu dut». Esplikatu zuenez, hiru ebakuntza egin behar izan dizkiote duodenoko tumore batengatik, eta aldakako beste hiru operazio ere izan ditu.
«Osasunean eragin dizu karguak?», galdetu zion Etxeberriak. «Neurri batean bai. Medikuek esaten zidaten ez zela zuzenena egiten ari nintzena, eta horrelakoak ordaindu egiten direla. Seguruenik, ordaintzen amaitu dut. Gaur egun, gauza bera ez egiten saiatuko nintzateke, baina ia ziur nago berdin egingo nukeela».
Alkatetza behin betiko uzten duen uneari buruz, etapa berri hori irudikatzea kosta egiten zaiola aitortu zuen. «Uste dut ez dela erraza nik daukadan bizitza hain bizitik egun guztia libre izatera pasatzea. Oraingoz ez dut horretan pentsatu nahi, baina Gabonetatik aurrera horretan hasi beharko dut», adierazi zuen, «gai sozialetan, boluntariotzaren esparruan» inplikatuko dela gehitu aurretik.
Herritarrek nola gogoratzea gustatuko litzaiokeen galdetuta, Aburtok zara erantzun zuen: «Pertsona on bat bezala».
