Adopzioetan 44 urteren aldea muga ez izateko eskatu du gizarte batzordeak

EGAB Euskadiko Ekonomia eta Gizarte Arazoetarako Batzordeak adierazi duenez, ez da «egokia» adopzioak egiteko foru aldundiek dituzten jarraibideen aldaketa. Aldundien jardunbidea dekretu baten bidez aldatzekoa da Eusko Jaurlaritza. Eta arau orokor gisa ezarri nahi du adoptatuen eta adoptatzaileen artean 44 urteren aldea egotea gehienez ere. Gaur egun ere gehienez 44 urteren aldearen arau hori badute aldundiek, baina aldundiko teknikariek banaka aztertzen dituzte kasuak. Horrela jokatzea egokiago iruditzen zaio EGABi, eta galdera egin du: zergatik den onargarria 44 urteren baino gehiagoren aldea behar bereziak dituzten umeak adoptatu nahi dituztenentzat, eta ez gainerakoentzat.