Administrazioan Euskaraz taldeak kexa bat aurkeztu zuen Nafarroako Arartekoaren bulegoan, Tafallako Udalaren lantaldean ezarritako hizkuntza eskakizunen kontura. Salatu zutenez, 137 postuk osatzen dute Tafallako Udalaren lantaldea, eta horietatik lautan soilik dago ezarria euskara jakiteko betebeharra: haur eskolako hiru hezitzaileen eta Euskara teknikariaren lanpostuetan, zehazki. «Gainerakoetan, euskara merezimendu gisa ere ez da aintzat hartzen», adierazi du Administrazioan Euskaraz-ek, ohar batean.
Arartekoak onartu egin zuen keza hura, eta txosten bat argitaratu zuen. Horretan, Tafallako Udalari gomendatu zion «beharrezko neurriak» hartzeko, «herritarrek administraziora euskaraz jotzeko duten eskubidea» bermatzeko.
Orain, Administrazioan Euskaraz-ek salatu du Tafallako Udalak ez duela gomendio hori onartu: «Esan du bere egoera soziolinguistikoaren arabera jada bermatua dagoela herritarrek administraziora euskaraz jotzeko duten eskubidea, Euskara teknikariak itzultzaile lanak egin ditzakeelako. Egia esan, gehiago espero genuen EH Bilduko udal batengandik».
Taldeak gaineratu du Tafalla 2017tik dagoela eremu mistoan, udalak berak hala eskatuta, baina aldaketa horrek ez duela «ekarri ia inolako ondorio praktikorik».
