Amancio Ortegak 15 milioi euro emango dizkio EAEko osasun sistema publikoari

Bost urteko inbertsioa azkartuko du Eusko Jaurlaritzak, Amancio Ortega fundazioarekin sinatutako hitzarmenaren bidez. Inditex enpresako buruak sortutako fundazioak 14,7 milioi euro emango dizkio EAEko osasun sistema publikoari, minbizia tratatzeko tresneria berria eros dezan. Diru horrekin, Osakidetzak bularreko minbizia antzemateko mamografo bat erosi ahalko du, baita erradioterapia egiteko dituen hamar azeleragailuak berritu ere.

Iñigo Urkullu Eusko Jaurlaritzako lehendakariak eta Flora Perez fundazioko presidenteordeak eman zuten hitzarmenaren berri, atzo, Lehendakaritzan. «Laguntza hau gabe ezin izango genuke epe laburrean hori guztia berritu; urtean azeleragailu bat berritzeko aukera izango genuke», aitortu zuen Urkulluk. Azeleragailu horiek Gurutzeta (Barakaldo, Bizkaia), Basurtu (Bilbo), Txagorritxu (Gasteiz) eta Donostiako ospitaleetan jarriko dituzte, egun dauden batzuen tokian. Halaber, mamografoa Basurtuko ospitalean jarriko dute. Puntako teknologiako makina horiek «berehala» erosiko ditu Osasun Sailak.

Jaurlaritzak gogorarazi du minbiziaren tratamendua 2020. urtera arteko osasun planaren lehentasunetako bat dela. «Hiru heriotzatik ia bat minbiziaren ondorioa da; lehen mailako talde profesionalak behar ditugu, baita teknologia aurreratuenak ere», zehaztu zuen. Amancio Ortega fundazioaren ekarpenak ildo horretan aurrera egitea ahalbidetuko duela gaineratu du.

320 milioiko aurrekontua

Ez da lehen aldia Amancio Ortega fundazioak osasun publikoa diruz laguntzen duela. Ordea, aurten asko handitu du laguntzen heina. 320 milioi euro eman nahi dizkie Espainia, Galizia, Katalunia eta Hego Euskal Herriko osasun publikoei. Osakidetzarekin sinatutako hitzarmena atzo aurkeztu zuen. Nafarroan, berriz, martxoaren 31n sinatu zuen. 5,7 milioi euroren hitzarmena izenpetu zuten, erradioterapiarako azeleragailu lineal bat, barne erradioterapiarako ekipo bat, bi eskaner eta mamografo digital bat erosteko. Hain zuzen, Laura Perez Nafarroako Ahal Dugu-ko idazkari nagusiak hitzarmena kritikatu zuen: «Behar beste baliabide egongo balira, ez litzateke halakorik beharko».