Hiru eguneko greba egingo dute Arabako, Bizkaiko eta Gipuzkoako anbulantzietako langileek. Hain zuzen, urriaren 9an, 10ean eta 11n izango dira lanuzteak, ELA, LSB-USO, LAB, UGT, CCOO eta ESK sindikatuek deituta. Erosahalmenari eustea eta lan baldintzak Osakidetzako langileen baldintzekin parekatzea eskatuko dute.
Sindikatuek kritikatu dutenez, urte eta erdi baino gehiago daramate negoziatzen: lan hitzarmen autonomiko berria sinatzeko 25 bilera egin dituzte. Eta, denbora horretan, patronalak «etengabe blokeatu» du negoziazioa, sindikatuek aurkeztutako eskaerei erantzun gabe. «Negoziazioarekin zerikusirik ez duten sabotaje ekintzak baliatu ditu negoziazioa blokeatzeko». Hori dela eta, Eusko Jaurlaritzari eskatu diote lan gatazkan esku hartzeko, eta patronala bultzatzeko negoziazioak «edukiz» hornitzera.
Enpresen finantzaketa %30 handitu da lehiaketa berrian, sindikatuek baieztatu dutenez. Hala ere, langileek «gehiago eta okerrago» egin behar dute lan hilabete amaierara heltzeko. Haien arabera, langileen soldaten egoera «larriagotu» egin da KPIaren gorakadarekin: «Bi urtean soilik, %12 inguruko erosahalmena galdu dute».
Hiru eguneko grebara ez ezik, beste mobilizazio batzuetara ere deitu dute sindikatuek. Irailaren 29an elkarretaratzea egingo dute Bilbon, Lan Harremanen Kontseiluaren aurrean; 09:30ean bilduko dira bertan. Urriaren 5ean, berriz, Eusko Legebiltzarraren aurrean egingo dute protesta, 10:30ean.
Anbulantzietako langileak hiru eguneko grebara deitu dituzte
Urriaren 9an, 10ean eta 11n egingo dituzte lanuzteak. Sindikatuen arabera, «blokeatuta» dago lan hitzarmen berriaren negoziazioa
Iruzkinak
Ez dago iruzkinik
Ordenatu
