Atzo iragarri zuten EAJk eta PSE-EEk zerga arloan akordioa erdietsi zutela, etxebizitzara sarbidea bultzatuko duen erreforma bat egiteko. Hain zuzen ere, bi alderdi horiek osatzen dute Arabako foru gobernua, eta aldundiak iragarri du jada era horretako zerga erreforma proposamen bat tramitatzen ari dela, etxebizitzaren eta enpresen sustraitzearen arloan eragiteko. Ramiro Gonzalez ahaldun nagusiak, hedabideei helarazitako ohar baten bidez, baieztatu du aldundia neurri sorta prestatzen ari dela jada. Geroago, Arabako Batzar Nagusiek onartu beharko dute erreforma hori.
Gonzalezek azaldu duenez, neurri sorta hori «prezio eskuragarrietan» alokatzen dutenei edo haien etxebizitzak alokairu programa publikoetan sartzen dituzten etxejabeei zerga hobariak ematera bideratu egongo da. Hobariak handiagoak izango dira alokairu horiek gazteentzako badira, eta «pizgarriak» egongo dira etxebizitza hutsak erakundeei saltzen dizkietenentzako. Erakundeek erositako etxebizitza horiek «alokairu sozial eta eskuragarrira» bideratu beharko dira, zehaztu du Gonzalezek.
Gazteei dagokienez, etxebizitza erosteagatik ordaintzen den zerga orokorra «%4tik %3ra jaitsiko da». Etxebizitza bat baino gehiago erosten dutenentzat, berriz, igo egingo da. Gainera, gune tentsionatuetako udaletxeek Ondasun Higiezinen Gaineko Zergaren errekarguak aplikatu ahal izango dizkiete etxebizitza turistikoei, eta etxebizitzak alokatzen dituzten enpresek «prezioak erreferentziazkoen edo programa publikoenen arabera egokitu beharko dituzte». Adinekoentzat ere egongo dira hobariak, zahar etxe batera joan ondoren haien etxebizitza programa publikoren baten bitartez alokatzen badute.
Hala ere, foru aldundiak prestatuko duen erreformak nolako ibilbidea izango duen ikusteko dago. Izan ere, EAJ eta PSE-EEk ez dute gehiengo osorik Arabako Batzar Nagusietan, eta, ondorioz, hirugarren alderdi batekin hitzartu beharko lituzkete neurri horiek. EH Bildurekin, Elkarrekin Ahal Dugurekin edo PPrekin negozia dezakete jeltzaleek eta sozialistek, eta, akordioa norekin erdietsi, onarturiko neurriek hirugarren alderdi horrek aurkezturiko proposamenen bat jasoko dutela aurreikusi daiteke.
