Hogei urtean lehen aldiz, Gipuzkoako Aspace elkarteko ikasleek ikasturtea irailaren 5ean hasiko dute, irailaren 1ean hasi beharrean. Ikasleek 33 eskola egun gutxiago izango dituzte ikasturte honetan. Aldaketak tentsioa eta haserrea eragin du garun paralisia dutenen eta haien familien elkartean. Aspaceko Hezkuntzako familia batzuk kexu dira, haien ustez hezkuntzarako eskubidea eta garraioa kendu dietelako. Hori ikusirik, elkarretaratzea egingo dute astelehenean, 10:30ean, Donostian, Eusko Jaurlaritzaren egoitzaren aurrean.
Orain arte, 3 eta 20 urte bitarteko Aspaceko ikasleek 213 eskola egun zituzten; orain, berriz, 180. Aspacek duela hilabete batzuk jakinarazi zuen murriztu egingo zuela elkarteko langileen lanaldia, hezkuntza sektoreko langileen lanaldira egokitzeko, hortik aldaketaren zergatia. Izan ere, orain arteko ereduak ez zuen bat egiten Hezkuntza Sailaren eskola egutegi ofizialarekin. Familia batzuen iritziz, Aspacek ikasleei eskola egunak kendu dizkie, eta Hezkuntzak eskolara joateko garraioa. Uztailean bukatu beharrean, hemendik aurrera ekainaren erdialdean amaituko dituzte klaseak Aspace Gipuzkoako Hezkuntza berezian dauden ikasleek. Guztira, hiru hilabete eta erdiz egongo dira ikasleak etxean, udako, Aste Santuko eta Gabonetako oporrak zenbatuta.
«Aspacek esan zigun alternatiba bat emango zigula, ez gintuela salduta utziko», gogoratu du Idoia Kastezubik, kexu diren familietako kide batek. Egunak pasatu dira, ordea, eta oraindik ez diete erantzun. «Dena hitzak dira, eta hitzak haizeak eramaten ditu; ez dakigu ezer». Horrek eragin zuzena du ikasleengan eta familiengan. Izan ere, haur eta nerabeek garun paralisia dute, edozein ekintza egiteko menpekotasun handia dute, eta ezin ditu edozeinek zaindu. «Atzerapen bat da ikasleentzat. Hezkuntza moteltzen du, eta oztopatu egiten du bertan jasotzen duten terapia, logopeda eta abar». Galera «izugarria» da Kastezubiren ustez. Era berean, familientzat ere karga dela esan du, denek ez dituztelako zaintzarako beharrezko baliabideak.
Familiek argi dute ez dutela haiek sortu «hezkuntza hutsune hau», baizik eta Aspacek eta Hezkuntza Sailak. Erantzun baten zain daude. Izan ere, esan dutenez, gizartea jadanik «oso murriztailea» da haien seme-alabekin, eta orain Aspacek berak eta Hezkuntza Sailak are murrizketa gehiago ezarriko ditu. Kezkati agertu dira etorkizunari begira: «Eskubide bat genuen eta kendu egin digute; zer izango da hurrengoa?».
