Datorren astelehenean eratuko dituzte Arabako Batzar Nagusiak, horretarako beharrezkoa den gutxieneko batzarkide kopuruak kredentzialak aurkeztu eta gero. Egun horretan aukeratuko dituzte Mahaia eta Batzar Nagusietako presidentea.
Bizkaian, datorren astelehena baino lehen eratu beharko dituzte Batzar Nagusiak, atzo aurkeztu baitzituzten kredentzialak hautetsien herenek. Gipuzkoan, ordea, oraindik ezein talderen batzarkideek ez dituzte aurkeztu kredentzialak, eta, beraz, oraindik ez dago eperik Batzar Nagusiak osatzeko.
Elkarrekin Podemosen hiru batzarkideek gaur aurkeztu dituzte kredentzialak, eta horrek bide eman dio Batzar Nagusiak eratzeko prozedura abiatzeari. David Rodriguez zerrendaburuak berretsi zuen koalizioaren asmoa dela gobernu «aurrerakoi» bat osatzea eta hartatik kanpo uztea EAJ, PP eta Vox. Baina, aldundia EAJk eta PSEk osatuko balute, Rodriguezek nabarmendu du koalizioa «funtsezko» litzatekeela politika «progresistak» negoziatzeko.
