Atarrabiako (Nafarroa) 70 urteko gizon bat desagertu zen larunbatean. Bilaketa modurik tristeenean bukatu da: hilik topatu dute gaur, 10:30 aldera. Hala baieztatu diote Poliziaren iturriek Europa Press agentziari. Ezkaba mendiaren magalean aurkitu dute gorpua, Moventis-TCC autobus garraio enpresaren inguruan. Gizona mendian behera erori zela uste dute. Hilotza Nafarroako Auzi Medikuntzako Institutura eraman dute, autopsia egiteko.
Larunbat arratsaldean eman zuten desagerpenaren abisua. Goizean kalera irten zen, baina ez zen etxera itzuli bazkaltzera. Orduz geroztik, suhiltzaileek, foruzainek, Atarrabiako, Burlatako eta Uharteko udaltzainek, eta boluntarioek jardun dute bilatzeko lanetan.
Foruzaingoak laguntza eskatu zien atzo herritarrei, sare sozialen bidez. Desagertuaren argazki bat eta haren ezaugarriak zabaldu zituen.
