Eusko Jaurlaritzako Segurtasun Sailak adierazi duenez, gazte bat atxilotu zuten eta sei ertzainek kolpeak jaso zituzten atzo, Donostian, Voxen ekitaldi baten kontrako protestetan. 17:30ean, alderdi ultraeskuindarrak informazio mahai bat jarri zuen Donostiako Sagastieder kalean, eta zenbait herritarrek kontra egin zieten. Ertzainak bertaratu ziren, eta, Segurtasun Sailak esandakoaren arabera, protestan ari zirenek harrika hartu zituzten.
Horren ondorioz, 26 urteko gazte bat atxilotu zuten. Segurtasun Sailak esan duenez, sei ertzainek kolpeak jaso zituzten, eta erietxean artatu behar izan zituzten. Atxilotutakoari desordena publikoak egitea leporatzen diote, eta gaur eraman dute epailearen aurrera.
SIPE Ertzaintzaren sindikatuak «lotsagarritzat» jo du Poliziaren operazioa. Esan dutenez, hara joan ziren ertzainek agindua jaso zuten protestan ari zirenen aurka ez oldartzeko eta foam jaurtigailuak ez erabiltzeko: «Agenteak behartuta egon ziren lasterka egitera eta furgonetetan ezkutatzera. Umiliagarria eta oso arriskutsua izan zen».
