Atzo Gimileoko San Pelayo mendian (Errioxa, Espainia) piztu zen sutea Araba hegoaldera iritsi zen, baina, gaueko hamarrak alderako, kontrolatzea lortu zuten. Sua arratsaldeko seiak inguru zirela piztu zen, Gimileon; haizeak zabaldu egin zuen, eta, Ebro ibaia zeharkatuta, Bastida inguruko zuhaizti batera iritsi zen.
Orduan, eten egin behar izan zuten Harotik Brioneserako (Errioxa) tren zerbitzua. Guardia eta Ganboako (Araba) suhiltzaileak ere aritu dira sua itzaltzeko lanetan, eta oraindik ere horretan dihardute, garrak ez daitezen berriz piztu. Zortzi hektarea inguru erre dira guztira, eta eraikin bat edo beste ere bai Gimileoko alde zaharrean. Araban, ordea, suteak ez du kalte handirik sortu.
Arabara heldu den hori atzo Errioxan piztu ziren zortzi suteetako bat da. Gutxi gorabehera 38-39 gradu izan zituzten atzo inguru horretan; badira egun batzuk bero handia hasi zela, lurra lehorra dago, eta sute arriskua handia da.
Nafarroan, Zarrakazteluko sua kontrolpean dute, baina oraindik ez dute itzali. 220 hektarea erre dira oraingoz, horietatik gehienak pinudi eremuak.
