Agertu da Barakaldoko 77 urteko gizonezkoa. Joan den ortziraletik zegoen desagertua; zehazki, udalerri horretako Done Bikendi auzoan 16:00 aldera azkenekoz ikusi zutenetik. Eusko Jaurlaritzak kontatu zuenez, mendira zihoala erran zuen gizonak, eta ez zen etxera bueltatu. Azkeneko aldiz ikusitako ordu bertsuan aurkitu du gaur bizilagun batek gizon bat lurrean etzanda, 16:15ean, eta berehala eman die abisua larrialdi zerbitzuei.
Etxeko garajera oinez sartzeko bidean aurkitu du bizilagunak, «lurrean etzanda, nekatuta, eta desorientazio sintomak zituela», eta larrialdi zerbitzuek ospitalera eraman dute, gizona nor zen identifikatu ondotik.
Desagertua aurkitzeko lanak atzo hasi zituzten berriro: bertzeak bertze, suhiltzaileek, Gurutze Gorriak, DYAk, Babes Zibilak, Barakaldoko udaltzainek eta Ertzaintzaren erreskate eta txakur unitateak hartu dute parte bilaketa lanetan, eta larrialdiei aurre egiteko teknikari batek koordinatu ditu.
