Autoritarismoaren kontrako manifestu bat sinatu dute 30 eragilek baino gehiagok, bozetan parte hartzeko dei eginez

Hauteskunde ziklo betean eta eskuin muturra Espainiako eta Frantziako gobernuetara iristeko inoiz baino gertuago dagoen honetan, hainbat eragilek ohartarazpen bateratu bat egin nahi izan dute, egoera horrek Euskal Herriko gizartearen eskubide eta askatasunei dakarkien mehatxua ikusita. Agiri bat plazaratu dute, faxismoaren eta autoritarismoaren kontra, eta dagoeneko 30 eragilek baino gehiagok egin dute bat; horien artean daude Nekane Balluerka EHUko errektore ohia, Mari Luz Esteban eta Jule Goikoetxea pentsalariak, Alaia Martin bertsolaria, Itziar Ituño aktorea, Aritz Erkiaga pilotaria eta Aitor Gorosabel abeslaria.

Gure etxeak zutik iraungo du goiburua jarri diote manifestuari, eta zera dio: nazioarteko jokalekua «gero eta kezkagarriagoa» dela, autoritarismoa indartzen ari delako, eta demokrazia, herrien askatasuna eta nazioarteko zuzenbidea «kolokan» jartzen ari direlako. Testuinguru horrek Euskal Herriari bete-betean eragiten diola ohartarazi dute, autogobernua, euskara, eskubide sozialak eta langileen eta herriko sektoreen eskubideak jokoan jarri dituelako. «Mehatxua ate joka dugu. Gure etxeko atariraino iritsi da», dio testuak.

Hain zuzen, sinatzaileek gogoratu dute iraganean faxismoa agintean izan zela Euskal Herrian, eta haren eraginak gogoan izan behar direla: «Franco eta Hitler Hendaiako tren geltokian elkartu ziren. Eskua eman zioten elkarri. Ez zaigu ahaztu. Garai hartan, Hendaia eta Irun lotzen dituen Etorbideko zubian, Gestapok Lluis Companys frankisten esku utzi zuen, fusilatu zezaten. Muga hartan bertan, naziek Meliton Manzanas torturatzailearen laguntza jaso zuten». Ez dute garai hura egungoarekin alderatzeko nahirik, baina bai azaldu dute historia ez dela «hitzez hitz errepikatzen den antzezlan txar bat», eta pertsonaia batzuk behin eta berriro agertzen direla, «mozorroa aldatuta» bada ere. «Eta gu ez gara ikusle hutsak izango».

Horrek konpromiso kolektiboa eta erantzun bateratua eskatzen dituela eta, herritarrei kalean mobilizatzeko deia egin diete, hala nola azaroaren 11ko etxebizitza eskubidearen aldeko greba orokorrean, azaroaren 14an EH Bilduk Bilbon Badatorren Euskal Herria defendatu lelopean egingo duen manifestazioan, azaroaren 21ean Baionan egingo den mobilizazioan eta azaroaren 28an Miarritzen Canon Françaisaren aurka egingo den mobilizazioan.

Halaber, Hego Euskal Herrian azaroaren 29an egingo diren hauteskundeei begira, testuingurua aintzat hartzea ere galdegin dute, «burujabetzaren, eskubideen eta askatasunen inguruko erabakietan herritarren parte hartzea funtsezkoa» dela nabarmenduta. «Ez dugu etsipenetik jardun nahi. Ezta beldurretik ere. Guk, eraiki nahi dugu», dio manifestuak.

Kulturaren, musikaren, artearen, kirolaren, bertsolaritzaren eta akademiaren alorreko askotariko pertsona ezagunak daude sinatzaileen artean. Hala ere, zerrenda luzatzea da haien nahia, eta, beraz, ekinaldiari atxikimendua adierazteko aukera izango du edonork: manifestua babestu eta sinatu daiteke jada labur.eus/etxeazutik helbidean. Ahalik eta herritar gehien batzea dute helburu, Euskal Herri askeago, bidezkoago eta demokratikoago baten aldeko konpromisoa herritar gehiagorengana zabaltzeko.