Ekainaren 9an egingo diren Europako Parlamenturako hauteskundeetarako zerrenda proposamena aurkeztu du EH Bilduk, eta irekita dago zerrendak berresteko bozketa; gaurko 07:00etan ireki dute, eta larunbatera arteko epea izango da. Mahai Politikoak erabaki zuen Pernando Barrena, ezker subiranistako eurodiputatua izango zela EH Bilduren zerrendaburu.
EH Bilduren erroldan inskribatutakoek eta bilkideek berretsi beharko dute Mahai Politikoak proposatutako zerrenda. Proposamena aurrera ateratzen bada, ezker subiranistako hainbat ordezkari izango dira zerrendan Barrenarekin batera: Oihana Etxebarrieta, EH Bilduren Eusko Legebiltzarrerako hauteskunde kanpainako bozeramailea; Oskar Matute, Madrilgo Kongresuko diputatua; eta Bakartxo Ruiz, EH Bilduren Mahai Politikoko bozeramaile ohia eta Nafarroako Parlamentuko talde parlamentarioaren bozeramaile ohia.
Horietaz gain, euskal gizarteko eta kulturako pertsona ezagun batzuek ere osatuko dute Europako hauteskundeetarako EH Bilduren zerrenda: Xabi Solano musikariak, Endika Guarrotxena Athletic Clubeko futbolari ohi eta Zaporeak elkarteko kolaboratzaileak, Andrea Rui-Wamba Aita Mari itsasontziko ekintzaileak, Alex Aginagalde Pantailak Euskaraz taldearen sortzaile eta bozeramaileak, eta Pili Garmendia Samaniegoko alkate ohi eta Arabako Errioxa Jatorri Deituraren bultzatzaileak.
Europako Parlamenturako hauteskundeak ekainaren 9an egingo dituzte. EH Bilduk oraindik ez du zehaztu ea bakarrik aurkeztuko den, edo duela bost urte eginiko koalizioa baliatuko duen berriro.
