Bateriak boladan daude. Iazko apirileko itzalaldiak agerian utzi zuen bateria finko handien instalazioak beharrezkoak direla energia berriztagarrien sorkuntza ziklo irregularrak egonkortzeko. Geroztik, egitasmoak izugarri ugaritu dira, eta gaur jakin da Bizkaiko Udondo Energia SM enpresak asmoa duela Artziniegan (Araba) halako planta bat eraikitzeko.
Eusko Jaurlaritzako Industria Sailak egitasmoaren ingurumen-inpaktu txostena argitaratu du gaur, eta aldekoa izan da. Erakundeek ezarritako baldintzekin, beraz, laster izango du baimena enpresak aurreikusitako bateria finkoen biltegia eraikitzeko. 4,175 megawatteko potentzia biltegiratu ahal izango du plantak.
14.000 metro koadro dituen partzela batean eraikiko dute, baina plantak berak 417 metro karratuko azalera baino ez du izango; igerileku olinpiko baten herena, alegia. 430 metro kable ere instalatuko ditu enpresak, biltegia sarearekin konektatzeko. Ibersun taldeko kide da Udondo Energia enpresa.
