Telefono deien, iragarpenen eta bilkura eskaeren zikloak ez du etenik: Edouard Geffray Frantziako Hezkuntza ministroak iragarri berritan 2028tik aurrera baxoko espezialitate bat euskaraz pasatzen ahalko dela, Seaskakoek gaitzetsi dute iragarpenak «inolako sinesgarritasunik» ez izatea. Izan ere, 2027an Frantziako presidentetzarako eta legebiltzarrerako hauteskundeak izanen dira; orduan, seguru aski, Geffray ez da gehiago ministro izanen.
Euskararen Erakunde Publikoak, berriz, «baikorki» hartu du berria. Honela adierazi du Maiger Behotegi lehendakariak: «Jakinarazpen hauek egiazko aitzinamenduak dira euskarazko irakaskuntzaren balioztatzeko eta aitortzeko. Eskerrik beroenak helarazi nahi dizkiet ministroari eta tokiko ordezkariei». Funtsean, Seaskak ere erran du baikorra dela iragarpena, «urte luzeetako borrokaren fruitua», baina «zur eta lur» gelditu dira ulertu orduko neurria 2028an baizik ez litzatekeela indarrean sartuko.
Gaur goizean agertutako agirian, parrastan zerrendatu dituzte zintzilik dirauten galderak: «Eta aurten, zer gertatuko da Lehenean Matematikako azterketan euskaraz erantzutea erabaki duten ikasleekin? Zigortuko dituzte? Etorkizuna hipotekatuko diete? Goi mailako ikasketetarako sarrera oztopatuko?». Hain zuzen ere, Seaskako ikasleek desobedientziara joko dute aurtengo baxoko azterketan. Maiatz hatsarrean, Bernat Etxepare lizeoko Leheneko ikasleek iragarri zuten matematikako proban euskaraz erantzunen dutela; ekainaren 12an izanen da azterketa.
Alde horretatik, Seaskako ordezkaritzak bilkura bat galdeginen die «lehenbailehen» Frantziako Hezkuntza ministroari eta Bordeleko errektoreari, adierazteko gibelatzerik ez dutela onartuko, eta «aurten berean hartuko dituzten neurriak zein diren argitzeko». EEPren izenean Behotegik ere erran du «xedea» badutela ekaineko azterketetan «euskara kontuan hartzeko modalitateez partaideekin lanean segitzeko».
Igandea iragarri zuen Geffray ministroak: zehazki, Ipar Euskal Herriko ikasleek espezialitate bat hautatzen ahalko dute, hari dagozkion idatzizko azterketa eta ahozko handia euskaraz egin ahal izateko. 2028ko baxoan gauzatzekoa dute aldaketa. «Zinezko sail elebidun baten» aitortza da, ministroaren hitzetan. Alta, ez die osoki erantzuten orain arte egindako eskaerei, eta, gainera, bi urteko epea eman du iragarpena betetzeko. «Zergatik bi urte itxaron 2026ko ekainean berean aplika daitekeen neurri batendako?», galdegin dute Seaskakoek.
Ministroak berak iragarpena egitean Bretainiako Ouest France egunkarian adierazi zuenez, goi ikasketetan ingelesez ikasten denean, azterketak ingelesez egiten dira, eta inork ez dio ikasleari galdegiten proba horiek frantsesez pasatzea; baxoa goi ikasketetako lehen diploma denez, logika bera aplikatu behar da. Logika betetzeko, ordea, badirudi bi urteko epea aplikatu dute, «sinesgarritasunik gabe», Seaskaren ustez.
Horretaz gainera, berritu dute ekainaren 6an Bordeleko errektoretzaren aitzinean elkarretaratzeko deia, baita ondoko egunetan izanen diren mobilizazioetan parte hartzekoa ere.
