Espainiako Senatuko ikerketa batzordean izan da goizean Oscar Txibite Nafarroako Gobernuko Lurralde Kohesioko kontseilaria. Bertan, Txibitek adierazi du Belateko tunelak zabaltzeko lanen adjudikzio prozesua «gardena eta legezkoa» izan zela eta Guardia Zibilaren txostenean ez dela ageri susmopean dauden herri lanen artean.
Ustez legez kanpoko komisioen truke Koldo Garciak, Jose Luis Abalosek eta Santos Cerdanek esku hartu duten obra publikoak ikertu nahi ditu batzorde horrek. Tartean PSOEko bi Antolakuntza idazkari ohi izanik, auzia mamitsua da PPrentzat, zeinak Senatuan gehiengoa baitu. Hala, auzi judizialak aurrera jarraitzen duen bitartean, ustelkeria susmoak politikoki baliatzeko aukera du eskuinak.
Ez da osaba
Detaile txikiek ere balio dute horretarako. Gaurko agerraldian, kasurako, Oscar Txibite Maria Txibiteren osaba dela zabaldu dute komunikabideek. Legealdi hasieran UPNk senide zuzen bat hatzarekin jarri izana aurpegiratu zion Nafarroako Gobernuko lehendakariari, baina datu hori okerra da. Oscar Txibite ez da Maria Txibiteren osaba, baizik osaba txikia: alegia, aitaren lehengusua da —berez Carlos Txibite PSNko idazkari nagusi zenaren anaia da, zeina bihotzekoak jota hil zen 2008an—. Lerroburuetan, baina, hainbat komunikabidek senide harreman zuzen horri egin diote aipamena.
Galderetan, berriz, Maria Caballero UPNko senatariak Belateko tunelak zabaltzeko lanen adjudikazioaz galdetu dio. Kontratu hura Servinabar, Acciona eta Oses Construcciones enpresen elkarteak irabazi zuen, eta lehen bi enpresa horiek ikerketapean direnez, halabehar horrek arreta handia piztu du. 76 milioi euroko kontratua esleitu zitzaion aldi baterako enpresa elkarte horri eta Txibitek onartu du behin lanak hasita kostuak aurreikusi baino handiagoak izango direla. Ez du zehaztu zenbat.
Berak gogora ekarri nahi izan du gobernuko kontseilariek ez dutela parte hartzen adjudikazio prozesu guztian. Nafarroako Kontuen Ganberak, 2023ko kontu publikoak ikuskatzeko orduan, adjudikazio horri erreparatu zion, eta ez zuen legez kanpoko irregulartasunik atzeman, nahiz eta konpondu beharreko kontu irregular batzuk adierazi zizkion gobernuari.
Cerdanengandik aldendu
Maria Caballerok salatu du kontratua «Santos Cerdanen enpresari» eman zitzaiola, eta Txibitek ukatu egin du datu hori. Guardia Zibilaren miaketan Cerdanek akzioen %45 erosi izanaren ohar pribatu bat agertu zen, baina defentsak ukatu egiten du horrek legezko baliorik duela. Hori gogoan, Txibitek gezurtatu egin du Nafarroako azken hamar urteetako herri lanik handiena Cerdanen enpresa bati eman zaiola. Dena den, Cerdanengandik aldendu nahi izan du: «Ez nuen harreman handirik. Kongresuko diputatu zen, eta alderdien arteko bitartekaritzarako funtzioak zituen».
Belateko tunelen kontratazio mahaia zortzi kidek osatu zuten, eta bik boto partikularra eman zuten. Lurralde Kohesioko Obra publikoen zuzendariaren lana defenditu du. «Bi txosten zituen mahai gainean. Adjudikazioaren aldeko txosten bat eta fiskalizazio txosten baleko bat. Egia da adjudikazioaren txostena ez zela aho batez erabaki, baina horrek ez dio zilegitasunik kentzen. Fiskalizazio txostenari, berriz, eragozpen ohar bat jarri zitzaion, baina hori ez da nahikoa adjudikazioa gerarazteko. Zuzendariak legezko akta horiek izanda, epaimahaiaren iritzia hartu zuen aintzat. Bestela zertarako balio du mahai bat izateak?».
Dena den, jarraian aitortu du ez duela ezeren edo inoren alde lepoa egingo. Berriro ere berdin jokatuko lukeela azpimarratu du. «Ez nuke honengatik dimisiorik emango». Epaimahai horretako buruzagiaren lana defenditu du. UPNk haren jarduna gogor kritikatu du, baina Txibiteren arabera, 46 lizitazio espedientetan parte hartu du eta bere curriculuma «bikaina» da.
Arratsaldean, epaimahai horretako idazkariak parte hartuko du ikerketa batzordean.
Geroa Baiko Uxue Barkosek adierazi du funtsezkoa dela prozesuaren garbitasuna defenditzea. Barkosek gogora ekarri du Nafarroako Kontuen Ganberaren txostena nahiko gogor mintzatzen dela prozedura horri buruz baina ez duela legez kanpoko ezer aurkitu.
EH Bilduk ohar bidez eskatu du ustelkeria praktika guztiak amaieraraino ikertzeko. Dena den, gogor kritikatu du Senatuan PPren estrategia alderdikoia eta gogora ekarri du alderdi horren ustelkeria kasuen zerrenda oso luzea dela.
