Gasteizko Kanpokale Berriko etxebizitza batean hamalau urte bizitzen daraman familia bat etxegabetuko dute gaur eguerdian. Lau lagun bizi dira han, bi heldu eta bi ume, 8 eta 10 urtekoak. Auzoan Bizi Etxebizitza Sindikatuak, Alde Zaharreko Ramon Bajo ikastetxeko hezkuntza komunitateak —han ikasten dute bi adingabeek— eta beste hainbat eragilek hara joateko deia egina dute goizetik, familiari elkartasuna adieraztera. Polizak goizean goizetik itxi ditu inguruko kaleak. 12:30etarako dago aurreikusita etxegabetzea.
Auzoan Bizi Etxebizitza Sindikatuak jakinarazi duenez, familiak 75.600 euro ordaindu dituela errentan urteotan guztiotan. Hilero fakturen dirua eskuz ordaintzen zuten, ordainketen erregistrorik gabe. 2021ean gastuak banku-transferentzia bidez ordaintzeko eskatu zioten jabeari, baina hark ez zuen onartu. Hilabete batzuk geroago, 2022ko urtarrilean, etxegabetze agindua jaso zuten.
Prozesua, ordea, luzatu egin da. Familiak epaiketa egin zuen, eta etxegabetzeen luzapen edo moratoriaren ondorioz, agindua urtez urte atzeratu zen, 2025eko abendura arte. Aurtengo maiatzaren 7an berriz aktibatu zen prozedura. Familiak salatu du abokatuak, haiekin kontsultatu gabe, 2.487,24 euroko legezko interesen zorra ordaintzea onartu zuela, etxegabetze aginduarekin batera.
Auzoan Bizi sindikatuak, bitartean, familiaren zaurgarritasuna frogatzea lortu zuen. Horri esker, uztailaren 9rako aurreikusitako etxegabetzea gaur arte atzeratu zen. Egun batzuk gehiago irabazi dituzte, baina ez dute etxebizitza alternatibarik lortu. Gasteizko Udaleko gizarte zerbitzuek ez diete konponbiderik eskaini negoziazio prozesuan. Salatu dutenez erakundeek egindako proposamen bakarra alokairu pribatuan beste etxebizitza bat bilatzea izan da.
Adingabeen eskubideak
Alde zaharreko eskolako irakasle eta gurasoek adierazi dutenez, etxebizitzaren arazoak zuzenean eragiten die ikasleei. Alokairuen garestitzea, azpietxebizitzak, pentsioetan edo lonjetan bizitzea eta etxegabetzeak gero eta presenteago daude haurren ingurunean.
Ezegonkortasun horrek, haien esanetan, eragina du haurren osasunean eta ikaskuntza prozesuan. Haien aldarria argia da: hezkuntza eskubidea ezin da bermatu etxebizitza eskubidea bermatzen ez bada. Horregatik familiaren etxearen inguruan elkartzera deitu dute. Ramon Bajo ikastetxeko irakasleak eta guraso elkarteko kideak ez ezik, Auzoan Bizi sindikatuko kideak, ikaskideak, karateko lankideak eta Alde Zaharreko beste kolektibo batzuk ere protestara batuko dira.
