EH Bilduk salatu du Gipuzkoako Ur Partzuergoko administrazio kontseiluan dagokion ordezkaritza «ukatu» diotela EAJk eta PSE-EEk. Talde subiranistaren arabera, jeltzaleek eta sozialistek ituna egin dute koalizioa ardura postuetatik aldentzeko. Presidente kargua eta beste lau ordezkari hari dagokiola iritzi dio EH Bilduk, udalerrietan lehen indar politikoa delako.
«EAJk eta PSEk uko egin diote ordezkari banaketa orekatua egiteari maiatzaren 28ko hauteskundeen emaitzetan oinarrituta», salatu du koalizioak. EAJren hitzetan, ordea, hautaketa modu hori ez da agertzen ur partzuergoaren estatutuetan. Gipuzkoako Urak-ek gaur osatu du bere administrazio kontseilua, eta Beasaingo alkate Leire Artola (EAJ) aukeratu dute presidente; Unai Larreategi Soraluzeko zinegotzia (EH Bildu) izango da presidenteordea.
