EH Bilduk salatu du Osakidetzaren lehen mailako arretan udan izan ohi diren murrizketek bere horretan jarraitzen dutela, Eusko Jaurlaritzak kontrakoa iradokitzeko egindako komunikazio kanpainak gorabehera. Rebeka Ubera legebiltzarkideak adierazi duenez, ez da lortu osasun zentroak 2023ko egoerara bueltatzea.
Osasun Sailak emandako datuen arabera, 2026an osasun zentroen %62k baino ez diote eutsiko jarduera «normaltzat» jotzen den arretari. Ehuneko hori 2025eko bera da, eta urrun dago 2023an erregistratutako %75etik. «Hobekuntza irudia eman nahi digute, baina datuek beste errealitate bat erakusten dute», esan du Uberak, Barakaldoko (Bizkaia) Urban osasun zentroaren aurrean egindako agerraldi batean.
EH Bilduko ordezkariak ohartarazi du arazoa ez dela soilik udako hilabeteetan gertatzen; are, esan du zentro batzuetan «egiturazko arazo» bihurtu dela langile falta. «Lehen hamar mediku zeuden leku batzuetan orain bost daude urte osoan». Ondarroako (Bizkaia) osasun zentroaren egoera jarri du adibidetzat: zazpi mediku zeuden han lehen, eta orain, berriz, hiru.
Ubera kritiko agertu da Osakidetzak erabiltzen duen «normaltasun» kontzeptuarekin. Haren ustez, zentroak irekita egoteak ez du bermatzen kalitatezko arretarik: «Plantillak ez dira nahikoak, agendak gainezka daude, eta hitzordu asko irailerako ematen ari dira».
Ubera Eusko Jaurlaritzaren komunikazio kanpainen aurka azaldu da, eta «marketin gutxiago eta soluzio gehiago» eskatu ditu. Haren esanetan, egiturazko neurriak behar dira Osakidetzaren arazoak konpontzeko, ez irudi publikoa hobetzeko kanpainak.
