Mertxe Aizpurua EH Bilduren Espainiako Kongresuko eledunaren irudiko, «aurrerapauso ukaezina da Txiki eta Otaegiren kontrako epaiak baliogabetzea eta legez kanpo zigortu eta fusilatu zituztela aitortzea», X sarean egin duen oharrean dioenez. Gainera, EH Bildurekin adostutako Memoria Demokratikorako Legeari esker lortu ahal izan dela gogoratu du: «Pauso honek aurrekaria izan beharko luke eskubide urraketen biktima guztiak aitortzeko».
Berretsi du lanean segituko dutela frankismoaren jazarpena jasan zuten senideei egia, memoria, aitortza eta erreparazioa emateko pauso sendoak emateko.
Sekretu ofizialen legean jarri du arreta. Hain zuzen, berretsi du lanean segituko dutela «lege frankista horrek ezarritako isiltasunaren eta inpunitatearen pean dauden kasu guztientzat» egia, justizia eta erreparazioa lortzeko.
Jaurlaritzak 2012an
Imanol Pradales Eusko Jaurlaritzako lehendakariak begi onez hartu du Espainiako Gobernuak Txiki eta Otaegi biktima gisa aitortu izana. X sarean ohar labur bat erantsi du. Gogoratu du Jaurlaritzak 2012an aitortu zituela estatu indarkeriaren biktima gisa. «Espainiako Gobernuak hartutako erabakiak osatu egiten du ezinbestekoa zen aitortza publikoa». Gehitu du lehendakari giza biktima guztien aintzatespen publikoa berresten duela.
