Caza Norte elkarteak irailaren 28rako deitutako mobilizazioak harrabotsa eragin du Gipuzkoako ehiztarien artean. Foru Aldundiak ehiza ordutegiak aldatu ditu, eta, erabaki horri desadostasuna adierazteko, elkarte horrek manifestazio bat egingo du, irailaren 28an: 12:00etan abiatuko dira Ondarretako biribilgunetik. Gipuzkoako federazioak, ordea, ez du bat egin protestarekin, uste baitu administrazio publikoekin elkarrizketan aritzea dela gatazkak konpontzeko modurik egokiena. Gipuzkoakoa ez ezik, EAEko ehiza federazioa ere Caza Norte elkartearen deialdiaren kontra agertu da.
Lurraldeko eskualde guztietako ehiza elkarteetako ordezkariekin bildu ostean hartu du erabaki hori Gipuzkoako federazioak, eta harekin bat etorri dira Bizkai eta Arabako ehiztariak. Izan ere, haien ustez, bertoko ehiztariak ez ditu ordezkatzen «egoitza soziala Oviedon (Espainia)» duen talde horrek. Are gehiago, «inguru honetako ehiza jardueraren nondik norakoak ez ditu ezagutzen»: «Lau katu baino ez dira, eta denak ezagunak beti Gipuzkoako federazioari aurka egin diotelako», nabarmendu dute plazaratutako oharrean.
Bizkaian eta Araban aspaldi sartu ziren indarrean Gipuzkoan ezarri dituzten ehiza ordutegiak, baina «horien kontra ez du egin Caza Norte elkarteak», federazioek adierazi dutenez. 2025-2026 denboraldiko lurraldeko ehiza debekuen aginduan jasota dago aldaketa hori, eta bereziki birigarro, basauso eta oilagorren ehizari eragingo die ordutegi aldaketak, Caza Norteren arabera. Gipuzkoako ehiza denboraldia irailaren 4an hasi zen, eta datorren urteko martxoaren 26an bukatuko da.
