Espainiako Gorteetarako hauteskundeak aurreratu izanak bete-betean eragin du Eusko Alkartasuna ematera doan erreleboan. Alderdia azaroaren 28an eta 29an egitekoa zen XV. Ohiko Biltzar Nazionala, baina bozak direla medio, azaroaren 12ko asteburura atzeratzea erabaki du. Arrasaten (Gipuzkoa) egingo du, eta zuzendaritzan errelebo bat emango da bertan, Eba Blanco idazkari nagusi eta Eusko Legebiltzarreko bigarren presidenteordeak jakinarazi baitzuen EAn duen kargua utziko duela.
Nazio Biltzarrean txosten politiko eta estatutu ponentzia bana onartuko dituzte EAko kideek. Zuzendaritzak aurkeztutako proposamenei 185 zuzenketa partzial aurkeztu dizkiete, baina, 2022ko biltzarrean ez bezala, ez da osoko zuzenketarik egon.
EAk azaldu duenez, txosten politikorako proposamenak «Euskal Herri bateratu, burujabe eta independente baterantz aurrera egiteko» estrategia bat planteatzen du, «bide baketsu, demokratiko eta instituzionalen bitartez Euskal Errepublika» eratzeko. Hala, autodeterminazio eta erabakitzeko eskubideak defendatzen ditu testuak, baita Euskal Herriko zazpi lurraldeak kontuak hartuko dituen «eraikuntza nazionala» ere.
Bide horretan, euskarari «nazio nortasuna egituratzeko eginkizuna» ematen dio alderdiak, eta Hegoaldearen eta Iparraldearen arteko lankidetza instituzionalerako «antolaketa deszentralizatu bat» nahi du. Era berean, «Herrien Europa» defendatu du, esanez aliantza subiranista aurrerakoiak direla eskuin muturrari aurre egiteko tresna.
EAk «demokrazia komunitario baterantz» jotzea proposatu du txosten politikoan, eta alderdiaren izaera sozialdemokratari erreparatuz, ongizate estatuan sakontzearen, fiskalitate progresiboa eta birbanatzailea bultzatzearen eta zerbitzu publikoak indartzearen alde egin du, baita berdintasunerako eta trantsizio ekosozialerako urratsak egiten jarraitzeko beharraren defentsa ere.
Azken urteetan, ildo ofizialaren eta kritikoen arteko tirabiren iturri izan da alderdiak EH Bildu barruan izan beharreko rola, baina azken biltzarrean onartu bezala, koalizio subiranista «indartzearen aldeko apustua» berretsi dute orain ere: «Ezkertiarrek eta indar subiranistek bat egiteko gune anitz gisa, EAren nortasun sozialdemokrata, instituzionala eta independentista babestuz».
