EH Bilduk Rocio Vitero proposatu du Gasteizko alkatetzarako

Rocio Vitero izango da EH Bilduren alkategaia datorren urteko udal eta foru hauteskundeetan. Gasteizko EH Bilduko Mahai Politikoak hura proposatu du alkategai izateko, eta harena izan da hautagaitzak erabakitzeko prozesuan aurkeztu den bakarra. Vitero (Gasteiz, 1980) EH Bilduren udal taldeko zinegotzia da 2019tik, eta gizarte langilea da ogibidez, gizarte politiken ikuskaritzan aditua. Gasteizko Mahai Politikoaren hitzetan, urteotan «Gasteizekin eta EH Bilduren proiektu politikoarekin duen konpromisoa» erakutsi du Viterok, eta haren hautagaitzak, «sinesgarritasun eta gaitasun frogatuak izateaz gain, argi erakusten du EH Bilduk nolako anbizioarekin eta segurtasunarekin aurre egingo dien 2023ko udal hauteskundeei». Herenegun, berriz, Arabako Mahai Politikoak Eva Lopez de Arroiabe (Gasteiz, 1973) aurkeztu zuen Arabako ahaldun nagusi izateko.