«Erantzun bat jaso arte ez gara hemendik mugituko, eta gaua bertan pasatzeko prest gara». Azkenean, Jean Rene Etxegarai Baionako auzapeza eta Yves Ugalde kulturako axuanta hurbildu zaizkie EHEko militanteei, eta hitzeman dute hamar eguneko epean Euskalgintzarekin bilduko direla Bernat Etxepareren Linguae Vasconum Primitiae Euskal Herrian atxikitzeko aukerez mintzatzeko.
Izan ere, protesta ekintza abiatu zuten goizean EHE Euskal Herrian Euskaraz taldekoek, Baionako Euskal Erakustokian, Etxepareren liburua Euskal Herrian atxiki dezatela eskatzeko.
BNF Frantziako Liburutegi Nazionalaren esku da gaur egun Etxepareren obra, baina urri hasieratik Baionan dago ikusgai. EHEk Euskal Herrian gelditu dadila eskatu du behin eta berriz, eta eskaera horri babesa adierazi dio euskalgintzak ere. BNFko zuzendariari egina diote eskaera.
Asteazken goiz honetan, Etxepareren obra erakutsia den gelan eseri dira EHEko kideak, eta Kontrapas kantatzeari ekin diote. Haien aldarrikapena oroitarazi, eta liburutegiaren erantzunik jaso ezean museoan segituko dutela erran dute.
