Ekainaren 30etik uztailaren 2ra selektibitateko ezohiko deialdia egin zuten Arabako, Bizkaiko eta Gipuzkoako 1.332 ikaslek. EHU Euskal Herriko Unibertsitateak gaur eman du emaitzen berri: 951k (%71,4) gainditu egin dute —ohiko deialdian, %96,7k gainditu zuten—.
Datuak xehatu ditu unibertsitateak: Arabako campusean, %77,9k gainditu dute; Bizkaiko campusean, %64,3k; eta Gipuzkoakoan, %79,8k. Hizkuntzari dagokionez, ikasleen %69,4k euskaraz egin dituzte azterketak; gainerako %30,6k, berriz, gazteleraz. Euskaraz egin dutenen artean, %75,7k gainditu dute; gazteleraz egin dutenen artean, berriz, %61,7k.
Datuok behin-behinekoak dira, eta hala nahi duten ikasleek etsaminak berrikustea eska dezakete. Hilaren 16an argitaratuko dituzte berrikusketen emaitzak eta behin betiko notak.
