ELAk Euskarafobia gida argitaratu du, euskaldunen hizkuntza eskubideak babesteko. Batetik, euskararen kontrako «bazterketa eta erasoak ikusarazteko» asmoa du, eta, bestetik, salatzeko tresna berriak eskaintzekoa. Bigarren horri dagokionez, «salaketa txokoa» jarri du martxan, langileek hizkuntza eskubideen urraketak erregistratzeko bide bat.
Lan munduan eta beste esparruetan gertatzen diren «jokabide euskarafoboak identifikatu eta ulertarazi» nahi ditu sindikatuak. Horretarako, 11 puntuko gida bat osatu du sindikatuak, eta euskarafobiaren alderdi ezberdinak jaso ditu. Horien artean, «supremazismoa», «euskarafobia ekonomikoa», «euskarafobia progrea» eta «euskarafobia administratiboa» zerrendatu dituzte. Azken horretan, Espainiako eta Frantziako estatuei «berdintasunaren izenean» ezarritako hizkuntza «uniformizazioa» leporatu diete.
Sindikatuaren arabera, zenbait arlotan, Espainiako eta Frantziako estatuek gaztelera edo frantsesa inposatzen dituzte, eta, sarritan, hizkuntza hegemonikoak ikastera behartu. Adierazi dutenez, horrek euskara «borondatezko eremuetara mugatzea» dakar. Gainontzeko eremuetan euskaldunen hizkuntza eskubideak murriztu edo «zuzenean ukatu» egiten direla salatu du sindikatuak.
ELAren aburuz, euskararen egoera «zapalkuntza historiko eta sakon baten» ondorioz dago horrela. Horren aurrean, sindikatuak konpromisoa hartu du «euskarafobiaren aurka jarrera aktiboa» hartzeko eta langileen hizkuntza eskubideak defendatzeko.
