Donostiako Zinemaldiaren ondoan, gaur, Zaintzaldia: Gipuzkoako zahar etxeei eta eguneko zentroei buruzko zinemaldia. Bertako langileen lan baldintzei buruzkoa, zehatzago esateko. ELAk antolatu du Zaintzaldia, Gipuzkoako zahar etxeetan aste honetan egin duen hirugarren greba egunean.
Kursaal jauregitik ez oso urrun, Gros auzoko Katalunia plazan, alfonbra morea zabaldu dute. Film labur bat eman dute: Gipuzkoako erresidentziak borrokan. Lanaldi osoko kontratuak eta soldata arrakala desager daitezela eskatu dute zahar etxeetako langileek. Enpresak lanaldi partzialak orokortzen eta inposatzen ari direla salatu dute.
Ikusi gehiago
Ohiko zinemaldietan egiten den moduan, sariak banatu dituzte. Maite Peña Gipuzkoako Zainketa eta Gizarte Politiketako diputatuari eman diote Urrezko Maskorra, «aldundiak sektorea prekarizatzeko egindako ibilbide luzeagatik». Sariak eman dizkiete prekaritateagatik, soldata arrakalagatik eta lan karga handienengatik. Matia, Zaintzen, Biharko eta Eulen enpresetako langileek jaso dituzte.
Zaintzaldiaren ondoren, parte hartzaileek manifestazioa egin dute Grosetik Bulebarrera.
