Azken boladan epaileek euskara eskakizunen aurka kaleratutako epaiak tarteko, EAJk joan den astean proposatu zuen derrigortasun indizea kentzea eta lan eskaintza publikoetan erakunde bakoitzak finkatzea euskara eskakizunak. ELAk aldaketaren kontra egin du, «gaztelaniaren nagusitasuna» finkatuko duela iruditzen baitzaio: «Administrazioetan euskara eskakizunak kentzea gaztelaniaren hegemoniari eusteko mehatxua da».
Sindikatuak gaitzetsi duenez, egun, herritarrek ez dute bermatua zenbait zerbitzutan euskaraz egin ahal izatea, besteak beste Ertzaintzan, justizia administrazioan eta Osakidetzan. «Langileek ere ez dute euskaraz lan egiteko aukerarik». Gogora ekarri dituzte euskara eskakizunen aurkako azkenaldiko ebazpenak ere: «ELAren iritziz, EAJren proposamenak ez du balioko euskara pairatzen ari den epai euskarafoboei aurre egiteko».
Hori ikusita, zera proposatu du sindikatuak: euskararen eta gazteleraren exijentzia «parekatzea» —gogorarazi du gazteleraz jakin beharra dagoela lanpostu publiko bat edukitzeko—, eta horretarako «arrazoizko epe bat» jartzea. Eta administrazioetan euskaraz ez dakiten langileei —bereziki behin-behinekoei— euskara ikasteko baliabideak bermatzea eta «ibilbide pertsonalizatuak» diseinatzea. «Salbuespenak egiteko aukerak ere aurreikusi behar dira euskara ikasteko saiakera egin eta porrot egiten dutenentzat edo erretiroa hartzear dauden langileentzat».
Nabarmendu dute hizkuntza eskubideak eta lan eskubideak «erabat bateragarriak» direla. Horregatik, EH Bilduk aurkeztutako aldaketa «oinarri gisa» hartzea beharrezkoa iruditzen zaie. Koalizioak EAEko Enplegu Publikoaren Legea moldatzeko proposamena egina du, euskaraz eta gazteleraz jakitea «orokorra» izan dadin enplegu publikorako sarbidean.
