Espainia erdialdean, Urdan (Toledo), tren istripu bat gertatu da gaur goizean, eta, Gaztela-Mantxako erkidegoaren arabera, gutxienez 68 lagun hil dira. Harridura eta samina eragin du albisteak, eta biktimak omentzeko elkarretaratzera deitu dute Hego Euskal Herriko hiriburuetako eta zenbait herritako udalek.
Eudel Euskal Udalen Elkarteak minutu bateko isiluneko elkarretaratzera deitu du, gaur 20:00etarako, tren istripuaren biktimen senide eta gertukoei «elkartasuna» adierazteko. Dei horrekin bat egin dute, besteak beste, Donostiako, Errenteriako eta Lasarte-Oriako (Gipuzkoa) udalek. Donostiako Udalak jakinarazi du, gainera, udalbatzak minutu bateko isilunea egingo duela bihar goizean ere. Gasteizko eta Bilboko udalek ere bat egin dute elkarretaratzeko deiarekin, eta gaur egingo dute, 20:00etan, udaletxe aurretan.
Iruñeko Udalak, tren istripuaren biktimengatik samina adierazi, eta elkartasuna adierazi die istripuaren ondorioz hildakoen eta zauritutakoen senide eta lagunei. Horrez gain, eskerrak eman dizkie erreskate taldeei eta larrialdi zerbitzuei. Iruñeko Udalak bihar eguerdirako deitu du elkarretaratzera: 12:00etan bilduko dira, udaletxearen aurrean. Abantoko Udalak ere (Bizkaia) bihar goizean egingo du minutu bateko isilunea, osoko bilkuraren hasieran.
