EP-IUk zerbitzu publikoak indartuko ditu landa eremuan

Arabako lautadan dago Dulantzi, Gasteiztik 14 kilometrora, eta 3.000 biztanle inguru bizi da bertan. Landa eremuko toki askotan dituzten «premia» berberak dituzte herrian: «Garraio publiko egoki eta on bat behar du, osasun zerbitzu hurbilagoak eta hornituagoak, ikastetxe publiko berri bat gazteek herrian bertan ikasteko aukera izan dezaten...». Garbiñe Ruiz Elkarrekin Podemos-IUren Gasteizko alkategaiak ongi ezagutzen ditu Dulantziko herritarrek dituzten beharrak, hango udal kiroldegian lan egin baitzuen politikara salto egin aurretik. Atzo, koalizioak lautadako herria aukeratu zuen eguneko ekitaldi nagusia egiteko, eta han mintzatu zen Ruiz: «Landa eremuko herrietan bizi direnen bizi baldintzak hobetu nahi ditugu, eta hori soilik zerbitzu publikoak indartuta lortuko da».

Landa eremuko Arabaren indarra lelopean, mitina egin zuengoizean EP-IUk Dulantzin, Martxoaren 8ko plazan. Ruizekin batera, oholtza gainean izan ziren David Rodriguez Arabako ahaldungaia, Esther San Martin Arabako Batzar Nagusietarako hautagaia, Jose Manuel San Juan Dulantziko alkategaia, eta zerrendako beste kide batzuk.

Landa ingurunean oinarrizko zerbitzu publikoak sendotzea ezinbestekoa dela nabarmendu zuten hizlariek, eta «publikoa» zaintzera deitu zuten, lurralde barruko «desberdintasunik, desorekarik eta kohesio faltarik»izan ez dadin. Ruizen hitzetan, herrietan bizi direnen bizi baldintzak «hobetzeko» proposamen «errealak» aurkezten dituen alderdi politiko bakarra da koalizioa, eta baita zerbitzu publikoak «anbiguotasunik gabe» defendatzen duen bakarra ere.

Hezkuntza publikoaren alde

Herrietako bizi kalitateari eusteko eta «garapen pertsonalerako» aukerak eskaintzeko, administrazio publikoek zerbitzu publikoak bermatu beharko lituzketela azpimarratu zuen Rodriguezek. Haren ustez, «funtsezkoa» da landa eremuan bizi direnek hirietan bizi direnek bezainbeste aukera izatea. Izan ere, salatu zuen EAJren eta PSE-EEren foru gobernuak «bi abiadurako» Araba bat sortu duela, eta horren ondorioz, «lehen eta bigarren mailako» herritarrek osatutako gizartea eraiki dela, zeinetan batzuen eta besteen arteko «distantzia» gero eta handiagoa egiten ari den.

Horiek hala, Rodriguezek ohartarazi zuen premiazkoa dela lurralde desoreka amaitzea, Arabako herritar denek aukera berberak izan ditzaten. «Herrietan bizi garenok ezinbestekoa dugu gure oinarrizko zerbitzuak kalitatearekin eta 30 minutu baino gutxiagoan eskura izatea. Horrela murriztuko dugu lurralde desoreka».

Hezkuntza publikoaren aldeko defentsa sutsua egin zuen Arabako ahaldungaiak, halaber. «Landa hezkuntza publikoa eta kalitatezkoa» aldarrikatu eta Dulantzin bigarren hezkuntzako ikastetxe publiko bat eraikitzeko galdegin zion Eusko Jaurlaritzari, 12 urte betetzen dituzten gazteek herritik kanpo joan behar ez dezaten ikastera. Salatu zuen Arabako herrietan hezkuntza publikoa «suntsitzen» ari direla, segregazioaren bitartez «ghettoak» sortuta eta zentroak baliabideez hustuz. «Ikastolei, itunpeko ikastetxeei eta ikastetxe erlijiosoei, ostera, ez zaie ezertxo ere falta», gaitzetsi zuen.

Bestalde, Dulantziko alkategai Jose Manuel San Juanek landa eremuko osasun zerbitzuen egoera «nekezaz» ohartarazi zuen. Azaldu zuen herrietan duten baliabide faltagatik eta osasun zentroen ordutegi murriztuengatik arreta jasotzeko zailtasunak dituztela, eta hirietan bizi direnen «eskubide eta aukera berberak» aldarrikatu zituen herrietarako.

Hiriaren aldean, herriak hezkuntzan, aisialdian, zaintzan eta osasunean atzean daudela salatu zuen, eta beharrezkotzat jo zuen erakundeetatik zerbitzu publikoak lehenestea. Besteak beste, Arabako kuadrilla guztiek anbulantzia medikalizatua izan beharko luketela defendatu zuen, «arta egokia» jasotzeko.